«ЮВТ Аэро» Мәскәү өлкәсендә булган теракт вакытында зыян күрүчеләрнең туганнарына бушлай очышлар оештыра

Бронь мәсьәләсе буенча авиакомпаниянең контакт-үзәгенә мөрәҗәгать итәргә мөмкин

Фото: Екатерина Красуцкая

22 нче март кичендә «Крокус Сити Холл» концерт залындагы теракт вакытында зыян күрүчеләрнең һәм һәлак булучыларның туганнары өчен «ЮВТ Аэро» компаниясе бушлай очышлар оештыра.

Авиаочышлар эчке маршрут челтәре буенча Мәскәүнең «Внуково» аэропортына һәм аннан кирегә башкарылачак. Ир яки хатын, әти-әни һәм балалар, бабайлар, әбиләр һәм оныклар, бертуган һәм үги абый-апалар, эне-сеңелләр, ир яки хатынның әти-әнисе бушлай оча алачак.

Билет алу өчен медицина документлары һәм туганлык дәрәҗәсен раслаучы документлар китерергә кирәк, дип хәбәр итә компаниянең матбугат хезмәте.

Бронь мәсьәләсе буенча авиакомпаниянең контакт-үзәгенә мөрәҗәгать итәргә мөмкин: +7 (843) 260-15-09 (тәүлек әйләнәсе).

Терактта һәлак булганнарны бүген Казан Башкарма комитетында бер минут тынлык белән искә алдылар. Элегрәк ТР башкаласы мэры Илсур Метшин вакыйга корбаннарының гаиләләренә һәм якыннарына кайгы уртаклашу сүзләре белән мөрәҗәгать итте.

23 нче мартта Казанның Бауман урамындагы «Сәгать» монументы янында чәчәкләрдән, уенчыклардан һәм шәмнәрдән торган стихияле мемориал барлыкка килде. Психологик ярдәмгә мохтаҗ кешеләр өчен шәһәрдә кайнар линияләр эшли. Белгечләр һәркемгә ярдәм итәргә әзер.

Шулай ук укыгыз

Барлык яңалыклар