Ди-джейлар чыгышы, мастер-класслар һәм фуд-корт – Дәрвишләрдә «Урамнар позитивы» фестивален үткәрәчәкләр

Экстремаль спорт төрләрендә теләгән һәркем ярыша ала

Фото: Денис Гордийко

(Казан шәһәре KZN.RU, 1 нче сентябрь). Казанның Дәрвишләр бистәсендә иртәгә «Урамнар позитивы» бөтенроссия урам культуралары фестивале узачак. Программада – бию һәм экстрим-спорт буенча ярышлар, мастер-класслар, диджейлар һәм рэперлар чыгышы.

Фестиваль мәктәп һәм яшүсмерләр клубларыннан, шулай ук яшьләр үзәкләреннән 2 меңгә якын баланы берләштерәчәк. Фестивальдә катнашу бушлай – ярышларга теләгән һәркем кушыла ала.

Чарада иң яхшы биючеләр һәм экстрим-спортчылар билгеләнәчәк. Брейкинг, скейтбординг, трюк самокаты һәм башка юнәлешләр буенча ярышлар игълан ителгән. Сылтама буенча теркәлергә мөмкин.

Фестиваль кунакларын спорт һәм иҗади мастер-класслар көтә. Шулай ук мәйданчыкта фуд-корт эшләячәк. Фестиваль Scratch Dj School музыкантлары һәм KVRTL Tunes рэп-командасы чыгышы белән тәмамланачак.

Чара 12:00 сәгатьтә Мир урамындагы паркта башлана. Тулырак мәгълүматны «Вконтакте» социаль челтәрендәге чара төркемендә белергә мөмкин.

«Урамнар позитивы» Казанда 2017 елдан бирле уза. Аның оештыручылары – «Яшьләр үсеше» төбәк иҗтимагый оешмасы, Казан Башкарма комитетының Балалар һәм яшьләр эшләре комитеты һәм Туризмны үстерү комитеты, ТР Брейкинг федерациясе, «Подросток» яшүсмерләр клублары берләшмәсе, ТР башкаласының Парклар һәм скверлар дирекциясе, шәһәрнең Совет районы администрациясе.

Шулай ук укыгыз

Барлык яңалыклар