Казан Ратушасында «Татарстан – истәлекле тәңкәләрдә» күргәзмәсе ачылды

Төрле елларда Россия Банкы Татарстанга һәм аның башкаласына багышланган 20-дән артык истәлекле акча чыгарды.

(Казан шәһәре KZN.RU, 27-нче август). Казан Ратушасында «Татарстан – истәлекле тәңкәләрдә» күргәзмәсе ачылды. Экспозициядә – Россия Федерациясе Үзәк банкы чыгарган истәлекле тәңкәләр фотосурәтләре, аларда уникаль архитектура һәйкәлләре һәм республика өчен әһәмиятле вакыйгалар сурәтләнгән.

Күргәзмәгә килүчеләр быел чыгарылган «Татарстан Республикасы оешуының 100 еллыгы» истәлек тәңкәсе, «Татарстан Республикасы» һәм «Казан» (шәһәрнең 1000 еллыгына «Россиянең борынгы шәһәрләре» сериясендә чыгарылган) тәңкәләре сурәтен күрә алачак.

Моннан тыш, экспозиция Казанда узган спорт ярышларына – 2013 елгы Бөтендөнья җәйге Универсиадасына, 2015 елгы су спорт төрләре буенча дөнья чемпионатына, 2018 елгы футбол буенча дөнья чемпионатына, шулай ук Казан Кремленә, Бөек Болгарга, Казан дәүләт университетына һәм Татарстан Республикасының башка истәлекле урыннарына багышланган металл акчалар белән таныштырачак, дип хәбәр ителә Россия Банкы сайтында.

Төрле елларда Россия Банкы Татарстанга һәм аның башкаласына багышланган 20-дән артык истәлекле акча чыгарды.

Казан Ратушасында күргәзмәгә 5-нче сентябрьгә кадәр 12.00 сәгатьтән 19.00 сәгатькә кадәр (дүшәмбе һәм якшәмбедән кала) барырга була. Керү ирекле.

Күргәзмә Россия Банкының Идел-Нократ дәүләт учреждениесенең Татарстан Республикасы буенча Милли банкы тарафыннан әзерләнгән.