Күчемсез милекнең Бердәм дәүләт реестрыннан өземтәләр хәзер хуҗаларның шәхси мәгълүматларыннан башка бирелә

Хокук иясе әлеге мәгълүматны ачу турында гаризаны КФҮдә, Росреестрда яки дәүләт хезмәтләре порталында бирә ала.

Фото: Денис Гордийко

(Казан шәһәре KZN.RU, 2 нче март). Кичә законга кертелгән үзгәрешләр үз көченә керде, алар нигезендә күчемсез милекнең Бердәм дәүләт реестрыннан шәхси мәгълүматларны хокук иясе ризалыгыннан башка тапшыруны тыю кертелде.

Хуҗаларның мәгълүматлары, хокук иясе үзенең шәхси мәгълүматларын – фамилиясен, исемен, атасының исемен, шулай ук туган көнен ачкан очракта гына өземтәдә күрсәтеләчәк. Моның өчен мәгълүматларны ачу турында банкларның һәм Росреестрның мәгълүмат каналлары аша, шулай ук бүгенге көндә булган барлык ысуллар – КФҮ бүлекләре, Росреестр сайты яки дәүләт хезмәтләренең бердәм порталы аша гариза бирергә кирәк.

Мондый язма булмаганда, Бердәм дәүләт реестрыннан белешмәләр гражданнарның хокукларын һәм законлы мәнфәгатьләрен яклау максатларында язма гариза нигезендә нотариус таләбе буенча тапшырылырга мөмкин. Мәгълүмат шулай ук күчемсез милек хокукы иясеннән нотариаль расланган ышаныч кәгазе алган затка бирелергә мөмкин, дип хәбәр ителә «Минем документлар» сайтында.

Шул ук вакытта законга кертелгән яңалыклар юридик затлар булган күчемсез милек хокукына ия булучыларга кагылмый. Алар турында мәгълүматлар һаман да ачык һәм Бердәм дәүләт реестрыннан алынган өземтәләрдә күрсәтелүен дәвам итәчәк.

Шулай ук укыгыз

Барлык яңалыклар