Яшь режиссураның «Һөнәр» бөтенроссия театр фестивале Казанда 8 мәйданчыкта узачак

Тамашачылар соңгы театр сезонында премьералары булган спектакльләрне күрәчәк.

(Казан шәһәре KZN.RU, 28-нче ноябрь). Казанда 6-23-нче декабрьдә яшь режиссураның «Һөнәр» бөтенроссия фестивале узачак. Фестивальдә 35 яшькә кадәрге режиссерлар тарафыннан куелган яки һөнәрдәге дебютларыннан соң 5 ел дәвамында куелган спектакльләрне күрсәтәчәкләр. Тамашачылар соңгы театр сезонында премьералары булган спектакльләрне күрәчәк.

«Һөнәр» спектакльләрен 8 театр мәйданчыгында күрсәтәчәкләр: Г.Кариев исемендәге Казан Татар дәүләт яшь тамашачылар театрында, Г.Камал исемендәге Татар дәүләт академия театрында, К.Тинчурин исемендәге Татар дәүләт драма һәм комедия театрында, Казан дәүләт яшь тамашачылар театрында, «Әкият» курчак театрында, «Угол» иҗат лабораториясендә, Казан Ратушасында һәм Werk арт-киңлегендә.

Моннан тыш, Кариев исемендәге театрның кече залында танылган театр тәнкыйтьчеләре белән очрашу-лекцияләр циклы узачак, дип хәбәр итә Татарстан Республикасы Мәдәният министрлыгының матбугат хезмәте.

«Һөнәр»нең беренче фестивале Казанда 2009 елда Г.Камал исемендәге театр инициативасы белән уңышлы узган иде.

Фестиваль программасы белән Г.Кариев исемендәге театр сайтында танышырга мөмкин.

Шулай ук укыгыз

Барлык яңалыклар