«Татарча диктант» бөтендөнья акциясе 13 нче октябрьдә старт ала

Узган ел аңа 31 ил һәм Россиянең 74 тән артык төбәге халкы кушылды

Фото: Денис Гордийко

(Казан шәһәре KZN.RU, 10 нчы октябрь). «Татарча диктант» белемнәрне тикшерү буенча бөтендөнья акциясе 13-15 нче октябрьдә узачак. Аңа онлайн яки офлайн теләгән һәркем кушыла алачак.

Акция өч көн дәвамында – 13, 14 һәм 15 нче октябрьдә 13:00 сәгатьтә үткәреләчәк. Диктантны теркәлеп, онлайн рәвештә diktant.tatar сайтында язган очракта, нәтиҗәләрне шунда ук шәхси кабинетта белергә мөмкин булачак, ә акция мәйданчыкларына килеп язган вакытта – 15 нче ноябрьдән соң. Казанда диктантны традицион рәвештә мәктәп укучылары, студентлар, мәгариф һәм мәдәният учреждениеләре хезмәткәрләре, хакимият органнары вәкилләре язачак. Акция мәйданчыклары турында diktant.tatar сайтында белергә мөмкин.

Диктант трансляциясе «ТНВ-Татарстан» һәм «ТНВ-Планета» телеканалларында оештырылачак.

Акция бөтен дөньяда яшәүче татарча сөйләшүче кешеләрне берләштерүгә, әдәби татар телен белүгә кызыксынуны арттыруга юнәлдерелгән, дип аңлата оештыручылар. «Татарча диктант»ны ТР Яшьләр эшләре министрлыгы, Бөтендөнья татар конгрессы, ТР Милли китапханәсе, Казан федераль университеты, ТР Милли музее һәм башкалар үткәрә.

2022 елда акциягә 31 илдә яшәүче һәм Россиянең 74 төбәгеннән милләттәшләребез кушылды. Акцияне уздырган еллар дәверендә диктантны бөтен дөнья буенча барлыгы бер миллионнан артык кеше язган.

Узган ел акциядә Казан Башкарма комитеты хезмәткәрләре дә катнашты. Үз белемнәрен төрле структур бүлекчәләр вәкилләре тикшерде, алар арасында Казан Башкарма комитеты җитәкчесенең торак-коммуналь хуҗалык һәм гражданнарны яклау мәсьәләләре буенча җаваплы урынбасары Искәндәр Гыйниятуллин һәм «Казан» гаилә үзәге директоры Наилә Мәлихова бар иде. Текстны «Тәртип радиосы»ның башкарма продюсеры Айваз Садыйров укыды.

Шулай ук укыгыз

Барлык яңалыклар