Белемнәр «галәме»: Татарстан башкаласында «Унискул» мәктәбенә керү юлында стела ачтылар

3,5 метр биеклектәге арт-объектның авторы – танылган Казан скульпторы Гадел Хәлиуллин

«Унискул» халыкара мәктәбе фотосы

Казанда «Унискул» халыкара мәктәбе янында «Галәм» стеласы ачылды. Белемгә юлны гәүдәләндерүче һәм укытучы белән укучыга багышланган арт-обьектның биеклеге 3,5 метрга җитә һәм аның авырлыгы бер тоннага якын. Стеланың авторы – танылган Казан скульпторы Гадел Хәлиуллин.

Скульптура композициясе диаметры 2,3 кв.метр булган түгәрәк формасында алюминий һәм бронзадан эшләнгән. Стела белем галәменә кулын күтәргән олы яшьтәге остазны сурәтли. Арт-объект нигезендә белем бирүне һәм үсеш баскычын гәүдәләндерә торган китаплар ята. Гранит постамент «фән граниты» идеясен ассызыклый – авыр, ләкин нәтиҗәле хезмәт, кешене рухи, физик һәм интеллектуаль яктан үстерә. Әлеге проект мәктәп тарафыннан шәһәрнең мәдәни-мәгариф киңлегенә керткән әһәмиятле эше булды, дип хәбәр итә шәһәрнең Мәгариф идарәсе матбугат хезмәте.

Ачылу тантанасында Казан башлыгы урынбасары Гүзәл Сәгыйтова, Казан Башкарма комитетының Мәгариф идарәсе җитәкчесе Ирек Ризванов һәм Совет районы башлыгы Роман Фәтхетдинов катнашкан.

«Илсур Рәисович сүзләренчә, безнең һәм сезнең мәктәпләр булмый. Мәгариф – ул безнең уртак эшебез, безнең хезмәттәшлек символы. Барыбызны да берләштерә торган әлеге искиткеч арт-обьектның ачылуы белән котлыйм», - диде Гүзәл Сәгыйтова.

«Галәм» стеласы, остазларга игътибарны арттырып һәм гомуми белем бирү хәрәкәтендәге традицияләрне һәм заманча алымнарны бергә берләштереп, мәгариф темасына сәнгать аша карарга мөмкинлек бирә.

Юныс Әхмәтҗанов юлы, 12 йорт адресы буенча урнашкан скульптураны теләге булган һәр кеше килеп күреп китә ала.

Шулай ук укыгыз

Барлык яңалыклар