Казанның барлык белем бирү учреждениеләре Дәүләт янгын күзәтчелеге тикшерүен узды

Юлларда балаларның куркынычсызлыгына зур игътибар бирелә.

(Казан шәһәре KZN.RU, 26-нчы август, Алинә Бережная). Казанның барлык белем бирү учреждениеләре Дәүләт янгын күзәтчелеге тикшерүен узды. Казанның мәгариф идарәсе башлыгы Илнар Һидиятов бүгенге эшлекле дүшәмбе киңәшмәсендә хәбәр иткәнчә, уку елы алдыннан мәктәпләрдә куркынычсызлык айлыгы оештырыла. Ул 14-нче августта старт алды, барлык белем бирү учреждениеләре хезмәткәрләре янгын куркынычсызлыгы һәм террорчылыкка каршы саклану буенча инструктаж тыңладылар.

Балаларның юлларда куркынычсызлыгына зур игътибар бирелә, дип билгеләп үтте И.Һидиятов. Әйтик, 20-нче августтан уку йортларында «Игътибар, балалар!» акциясе башланды. «Беренче уку көннәреннән укучыларның үзләре белән эш башланачак: Гадәттән тыш хәлләр министрлыгы һәм ЮХИДИ хезмәткәрләре катнашында сыйныф сәгатьләре, уртак рейдлар, ата-аналар җыелышлары оештырылачак», - диде И.Һидиятов һәм шулай ук мәктәпләрдә Беренче сыйныф укучысы көне дә узачак, дип өстәде. Балаларны мәктәптә, җәмәгать урыннарында үз-үзеңне тоту кагыйдәләренә өйрәтәчәкләр һәм яктылык кайтаручы элементлар өләшәчәкләр.

Укучылар иминлеген тәэмин итүнең тагын бер аспекты балаларны база мәктәпләренә йөртүне оештыруга кагыла. 986 бала өчен 24 мәктәп маршруты оештырылган. Мәктәп автобуслары паркы 30 берәмлек техника тәшкил итә.

«Барлык автобуслар да балаларны оешкан төстә ташу кагыйдәләре таләпләренә туры килә, лицензияләре бар, АТП-2 һәм АТП-4 тарафыннан аларга хезмәт күрсәтелә. Барлык маршрутлар яңа уку елына кабул ителгән», – дип сөйләде И.Һидиятов.