«Казан гасырлар аша» күргәзмәсенә керү апрель ахырына кадәр бушлай булачак

Экспозициядә Казан ханлыгы чорына караган археология предметлары һәм хәзерге рәссамнарның картиналары тәкъдим ителә.

Фото: «Казан Кремле» музей-тыюлыгының матбугат хезмәте

(Казан шәһәре KZN.RU, 28 нче февраль). Казанлылар һәм ТР башкаласы кунаклары Казан Кремлендә ачылган «Казан гасырлар аша» күргәзмәсен бушлай карый ала. Экспозициягә бушлай керү 30 нчы апрельгә кадәр мөмкин булачак, дип хәбәр итә «Казан Кремле» музей-тыюлыгының матбугат хезмәте.

Экспозициядә Казан ханлыгы чорына караган уникаль археология предметлары, шулай ук Татарстан Республикасының хәзерге рәссамнары әсәрләре тәкъдим ителә. Гомумән алганда, өч залда 590 га якын экспонат куелган.

Күргәзмә сишәмбе, чәршәмбе, пәнҗешәмбе, шимбә һәм якшәмбе 10:00 дән 18:00 гә кадәр, җомга көнне 11:00 дән 20:00 гә кадәр эшли. Дүшәмбе – ял көне. Өстәмә мәгълүматны +7(939)315-08-83 телефон номеры буенча белергә мөмкин.

Шулай ук укыгыз

Барлык яңалыклар