Казанның «Зәңгәр» мәчетендә кичке ислам дәресләре үткәрелә

Дәресләрне ТР мөселманнары Диния нәзарәтенең шәригать белгечләре һәм голәмәләре, якшәмбе көнне ТР мөфтие Камил хәзрәт Сәмигуллин үзе алып барачак.

Фото: ТР мөселманнары Диния нәзарәте матбугат хезмәте

(Казан шәһәре KZN.RU, 6-нчы октябрь). Казанлылар ислам буенча тирәнтен дәресләргә йөри ала. Аларны ТР Диния нәзарәтенең шәригать белгечләре һәм голәмәләре «Зәңгәр» мәчеттә үткәрә.

Кичке дәресләр көн саен уздырыла, керү – ирекле һәм бушлай. Бер дәрес сәгать тирәсе дәвам итә. Дүшәмбе көннәрендә Идрис хәзрәт Киёмов таҗик телендә «Гакыйдә әт-Тәхавия» дәресен алып барачак, сишәмбе көннәрендә Нурислам хәзрәт Вәлиулла Галимҗан Барудиның «Кырык хәдисе» буенча дәрес уздырачак, чәршәмбе көннәрендә Булат хәзрәт Мөбарәковның «Нур әл-идах» (хәнәфи фикъһе) дәресе, пәнҗешәмбе көннәрендә Әхмәд Әбү Яхъяның «Гакыйдә» дәресе, җомга көннәрендә Булат хәзрәт Мөбарәковның «Аллаһка якынаю этаплары» дигән дәресе булачак. Эш көннәрендә барлык дәресләр 18:30 сәгатьтә башлана.

Ял көннәрендә, шимбә һәм якшәмбе, 17:30 сәгатьтә башлап өйрәнүчеләр өчен тәҗвид буенча практик курслар оештырыла, аларны Әхмәд хәзрәт Ибраһимов алып бара. Якшәмбе көнне ястү намазыннан соң имам Раббаниның «Мактубат» хезмәте буенча дәресне ТР мөфтие Камил хәзрәт Сәмигуллин уздыра.

Барлык теләүчеләрне Сара Садыйкова урамы, 8/19 адресы буенча көтәләр. Дәресләрдә катнашу мөмкинлеге булмаган кешеләр аларны онлайн-режимда ТР Диния нәзарәтенең Instagram битендә карый ала. Тулырак мәгълүматны +7(800)222-76-76 телефоны аша алырга мөмкин (эш көннәрендә 10:00 сәгатьтән 16:00 сәгатькә кадәр), дип хәбәр итә ТР Диния нәзарәте матбугат хезмәте.

Шулай ук укыгыз

Барлык яңалыклар