Вандаллар Горький шоссесында урнашкан җиде җәяүлеләр кичүендәге лифтларга зыян салган

Әлеге мәгълүмат буенча полиция хезмәткәрләре тикшерү үткәрә, зыян суммасы өстәмә бәяләнәчәк

Казан шәһәре KZN.RU фотосы

Казанда билгесез затлар Горький шоссесындагы җәяүлеләр кичүендә урнашкан җиде лифттагы җиһаз элементларын сафтан чыгарган. Әлеге очрак буенча полициягә гариза юлланган, җинаять эше кузгатылган.

Хокук бозучылар аңлы рәвештә Фрунзе урамында 19, 13 һәм 3а номерлы торак йортлар янындагы җәяүлеләр кичүләрендә, Горький шоссесы белән Восстание һәм Можайский урамнары киселешендә, Горький шоссесы урамындагы 30 номерлы торак йорт янында һәм Аккош күле автотранспорт тукталышындагы җир асты җәяүлеләр кичүендә җәмәгать лифтларына зыян салган.

Якынча бәяләүләр буенча, кичүләрдә лифт кабинасындагы 6 боерык панеле, 5 тотка, яктырту системасы, катларны күрсәтә торган 26 чакыру төймәсе, 30 ишекне ачу/ябу төймәсе, 13 диспетчер белән элемтәгә керү төймәсе, 6 сыгылмалы/шлейф кабель, кат мәйданчыкларында 12 лифт кабинасын чакыру посты, 39 видеокүзәтү камерасы, шахта ишекләрендә 10 йозак, 10 кабина ишеге, кабина ишеге белән идарә итүгә кагылышлы 3 блок, 6 сөйләшү җайланмасы һәм 1 роутер ватылган, дип хәбәр итә шәһәрнең Тышкы төзекләндерү комитеты.

Казан мэриясе вандализмның җинаять җәзасына тарттыра торган гамәл булуын искәртә. Россия Федерациясе Җинаять кодексының «Вандализм» 214 маддәсе нигезендә, хокук бозучыларга төзәтү эшләре билгеләнә һәм штраф яный.

Зыян суммасы өстәмә бәяләнәчәк.

Шуңа бәйле рәвештә шәһәр администрациясе гражданнарны гомуми милеккә карата игътибарлы булырга һәм аны куллану кагыйдәләрен үтәргә чакыра.