Татарстанда 650 үзирекле коронавирус инфекциясеннән вакцинация узачак

Теркәлүдән соңгы тикшеренүләрдә мәгариф өлкәсендә эшләүчеләр һәм Кулланучылар хокукларын яклау һәм кеше иминлеге өлкәсендә күзәтчелек федераль хезмәте хезмәткәрләре катнашачак.

Фото: Марат Мугинов

(Казан шәһәре KZN.RU, 2-нче декабрь, Ксения Швецова). Ноябрь ахырында Россиядә COVID-19-дан «ЭпиВакКорона» вакцинасының теркәлүдән соңгы тикшеренүләре башланды. Татарстан сынау төбәкләрнең берсе булды, республикада куркыныч янаган төркемгә караган 650 кеше вакцинация узачак. Бу хакта бүген «Татар-информ» мәгълүмат агентлыгында узган матбугат конференциясендә ТР буенча Кулланучылар хокукларын яклау һәм кеше иминлеге өлкәсендә күзәтчелек федераль хезмәте идарәсенең матбугат сәркатибе Миләүшә Җамалиева хәбәр итте.

Яңа коронавирус инфекциясенә каршы «ЭпиВакКорона» вакцинасын Кулланучылар хокукларын яклау һәм кеше иминлеге өлкәсендә күзәтчелек федераль хезмәте системасына караган «Вектор» фәнни-тикшеренү институты эшләде. Татарстаннан тыш, тикшеренүләр үткәреләчәк пилот субъектлар арасында Мәскәү шәһәре, Мәскәү, Төмән һәм Калининград өлкәләре булды. Бу субъектларга вакцинаны 26-нчы ноябрьдә китерделәр. Медицина препаратын күчереп йөрткәндә һәм саклаганда белгечләр кирәкле барлык таләпләрне үти, шуларның берсе - Цельсий буенча 2-8 градус температура режимын саклау.

Барлыгы Россиядә тикшеренүләрдә 4 мең кеше катнашачак, шул исәптән 650 кеше - Татарстаннан.

«Үзиреклеләрне куркыныч янаган төркеменәрдән сайладылар - бу мәгариф өлкәсе хезмәткәрләре, шулай ук биоматериалларны тикшерүдә катнашкан һәм турыдан-туры инфекция учакларында эшләүче Кулланучылар хокукларын яклау һәм кеше иминлеге өлкәсендә күзәтчелек федераль хезмәте системасы хезмәткәрләре, - дип аңлатты М.Җамалиева. - Бу нәкъ менә вакцинаны тикшерү, ә аны гражданлык әйләнешенә кертү түгел, дип билгеләп үтәсем килә».

Тикшеренү нәтиҗәләре буенча белгечләр вакцинаның нәтиҗәлелеге турында нәтиҗәләр ясый алачак.

Шулай ук укыгыз

Барлык яңалыклар