Казаннан махсус хәрби операция зонасына махсус җайланмалар төялгән 74 нче йөк машинасы юлга кузгала

Полклар һәм батальоннар өчен Татарстаннан йөк җибәрү чарасында Казан мэры Илсур Метшин катнашты

Казаннан махсус хәрби операция зонасына хәрбиләр өчен билгеләнгән махсус йөк төялгән 74 нче фура юлга кузгала. Хәрбиләргә ярдәм буларак квадроцикл, генераторлар, квадрокоптерлар, FPV-дроннар, РЭБ автомобиль системасы, дроннар өчен сигнал көчәйткечләр, радиостанцияләр, йокы өчен җайланмалар һәм башка бик күп кирәк-ярак җибәрелә. Йөк машинасы юлга кузгалыр алдыннан Казан мэры Илсур Метшин җайланмаларны карап чыкты.

Денис Гордийко фотосы

«Бүген без фронт сызыгындагы батыр сугышчылар өчен 74 нче ярдәмне оештырдык. Без даими рәвештә егетләр белән элемтәдә торабыз һәм нәкъ менә алар сораган кирәк-яракны җибәрергә тырышабыз. Гомумән алганда, битараф булмаган шәһәр кешеләре, эшмәкәрләр һәм предприятиеләр ярдәмендә Казан инде моңа кадәр дә йөкләр җибәрде һәм хәрбиләрнең гаиләләренә гомуми суммасы 3 миллиард сумлык ярдәм күрсәтелде. Без сугышчыларның гаиләләре белән системалы эшне дәвам итәбез, алар өчен бу бик мөһим», - дип белдерде Илсур Метшин. Казан мэры шулай ук Яңа ел алдыннан Лисичанскта һәм Рубежныйда яшәүчеләргә тагын бер гуманитар йөк җибәрү турында игълан итте.

Махсус ярдәм «Алга», «Батыр», «Тимер» батальоннары, 218 нче танк полкы, шулай ук 428 һәм 1232 нче роталар хәрбиләре өчен билгеләнгән. Сугыш хәрәкәтләре зонасына квадроцикл, генераторлар, квадрокоптерлар, FPV-дроннар, РЭБ автомобиль системалары, дроннар өчен сигнал көчәйткечләр, дрон детекторлары, радиостанцияләр, рацияләр өчен аккумуляторлар, дроннар өчен зарядка җайланмалары, тышка чыгарыла торган мачталар, тышкы идарә итү пунктлары, дроннар өчен махсус комплектлар, бензин белән эшли торган кискечләр, дроннар өчен аккумуляторлар, ноутбуклар һәм йокы җайланмалары җибәрелә. Кирәк-яракларның барысы да сугышчыларның сорауларыннан чыгып җыелган, аны Казан Башкарма комитеты Аппараты җитәкчесе Булат Алиев озата барачак.

Исегезгә төшерәбез, Казан махсус хәрби операциядә катнашучыларга һәм аларның гаиләләренә һәрдаим ярдәм итеп тора. Махсус хәрби операция башланганнан бирле, Казан Мэриясе, «Игелекле Казан» эгидасы астында Лисичанск һәм Рубежный халкы өчен 86 йөк машинасы җибәргән. Бу шәһәрләргә гомуми суммасы 500 миллион сумнан артык 1,6 тоннага якын ирекле ярдәм тапшырылган.

Шәһәр администрациясе махсус хәрби операциядә катнашучыларның гаиләләрен контрольдә тота. Беренче чиратта балигъ булмаган балаларга ярдәм күрсәтелә: мәктәпләрдә укучылар ике тапкыр түләүсез туклану белән тәэмин ителә, әтиләре хәрби зонада булган балалар балалар бакчасына йөргән өчен ата-ана түләвеннән азат ителә.