Казанның Вахитов районында яңа блоклы-модульле котельный эшли башлаячак

Объект дүрт торак йортны һәм балалар бакчасын җылылык белән тәэмин итәчәк

Фото: Денис Гордийко

(Казан шәһәре KZN.RU, 25 нче июль, Диана Жиленкова). Киләсе җылыту сезонында Казанның Вахитов районында яңа блоклы-модульле котельный эшли башлаячак. Ул «ВКНИИВОЛТ» заводының тузган комплексы урынына дүрт торак йортны һәм балалар бакчасын җылылык белән тәэмин итәчәк. Хәзер котельныйны Курск урамындагы участокта монтажлыйлар. Эш барышын шәһәр Башкарма комитеты җитәкчесе Рөстәм Гафаров тикшереп кайтты.

«Казэнерго»ның баш инженеры Юрий Никоноров сөйләвенчә, хәзерге вакытта Курск урамында монтажлана торган котельныйны, аерым өч метрлы компонентларга бүлеп, Толстой урамындагы 39 нчы бина янындагы мәйданга алып киләчәкләр һәм җыячаклар.

Хәзер мәйданчыкны объектны урнаштыруга әзерлиләр, аны гамәлдәге коммуникацияләрдән, аерым алганда, электр кабельләреннән азат итү мәсьәләсе хәл ителә. Аннары эшчеләр нигез сала башлаячак. Аны август ахырына кадәр башкарырлар дип көтелә.

«Параллель рәвештә ресурсларны җәлеп итү мәсьәләләре дә хәл ителә – бу су, газ, электр энергиясе һәм җылылык челтәрләре, алар буенча кулланучылар җылылык белән тәэмин ителәчәк. Боларның барысын да җылыту сезоны башланганчы эшләү планлаштырыла. Барлык җиһазлар да нигездә Россиянеке, алар инде әзер. Комплектация белән проблема юк», – дип ышандырды Юрий Никоноров.

Аның сүзләренчә, яңа котельныйның җылылык куәте 4МВт (2МВт белән ике казан) яки 3,5 Гкал/сәгать тәшкил итәчәк. Ул дүрт торак йортны, балалар бакчасын һәм башка берничә кулланучыны җылылык белән тәэмин итәчәк. Элегрәк аларны «ВКНИИВОЛТ» заводына караган котельный җылыта иде.

«Хәзерге вакытта котельныйның торышы канәгатьләнерлек түгел, әлеге чыганактан алга таба җылылык белән тәэмин итү мөмкин түгел. Шуңа күрә карар кабул ителде: шәһәр яңа чыганак төзи, аңа гамәлдәге кулланучылар күчереләчәк», – дип йомгаклады «Казэнерго»ның баш инженеры.

Күчмә киңәшмәдә шулай ук Казан Башкарма комитеты җитәкчесе урынбасары Искәндәр Гыйниятуллин, Торак-коммуналь хуҗалык комитеты рәисе Василий Лысачкин һәм Вахитов һәм Идел буе районнары администрациясе башлыгы Альберт Салихов катнашты.

Май аенда ТР башкаласында җылыту сезонына әзерлек башланды. Быел барлыгы 46,8 км җылылык челтәре яңартылачак һәм өч казан яңартылачак. Кыш көне тагын бер яңа блоклы-модульле котельный төзелде – ул 600 дән артык кеше яшәгән җиде күпфатирлы торак йортны, шулай ук балалар бакчасын һәм поликлиниканы җылылык белән тәэмин итәчәк.

Биш ел эчендә Казанда 77 км җылылык челтәрен алыштырдылар һәм 31 котельныйны реконструкцияләделәр. 2022 елда 13,5 км озынлыктагы җылылык челтәрләре яңартылды һәм салынды, Музыкальная урамы, 8, Музыкальная урамы, 10, Каштан урамы, 18, Боевая урамы, 13 адреслары буенча урнашкан котельныйларда дүрт казанны алмаштырдылар.