Казанның яшьләр сәясәте учреждениеләрендә идарә итү вазыйфаларына кадрлар резервына җыю башланды

Кандидатларга бәяләү чараларын, белем бирү интенсивын үтәргә һәм үз проектларын якларга туры киләчәк.

Фото: Денис Гордийко

(Казан шәһәре KZN.RU, 3 нче октябрь, Юлия Летникова). Казанда яшьләр сәясәте учреждениеләрендә идарә итү буенча кадрлар резервын формалаштыру буенча конкурс дәвам итә. Документларны 5 нче октябрьгә кадәр тапшырырга мөмкин. Бу хакта эшлекле дүшәмбе киңәшмәсендә Казан Башкарма комитетының Балалар һәм яшьләр эшләре комитеты рәисе Алия Заһидуллина хәбәр итте.

Яшьләр сәясәте учреждениеләрендә үз эшенең профессионаллары кирәк, дип ассызыклады Казан Башкарма комитеты җитәкчесе Рөстәм Гафаров. «Инициативалы, перспективалы һәм талантлы белгечләр, шулай ук яшьләр белән эшләргә һәм шәһәрдәге балалар һәм яшьләр файдасына үзгәрешләр кертүдә катнашырга теләүчеләрне конкурста катнашырга чакырабыз», – диде ул.

Конкурста катнашучыларга төп таләпләр – югары һөнәри белем һәм җитәкче вазыйфаларда кимендә өч ел эшләү стажы. «Иң төп критерийлар – яңа идеяләрне һәм проектларны үстерү, тормышка ашыру, шулай ук яшьләр һәм Казан халкы файдасына үзгәрү һәм үзгәртү теләге», – дип билгеләде А.Заһидуллина.

Документлар Балалар һәм яшьләр эшләре комитетында (Петербург ур., 70) 14 нче кабинетта кабул ителә. Конкурсантлар комиссиягә гариза, анкета һәм башка документлар тапшырырга тиеш, тулы исемлек белән сылтама буенча танышырга мөмкин.

Документларны тапшырганнан соң катнашучылар бәяләү чараларын узачак, анда нәтиҗәле идарә итү системасы законнары һәм принциплары турындагы белемнәрне, шулай ук һөнәри күнекмәләр дәрәҗәсен тикшерәчәкләр. Конкурс кысаларында катнашучылар өчен Казан Башкарма комитетының Кадрлар сәясәте идарәсе тарафыннан оештырылган белем бирү интенсивлары узачак, дип хәбәр итте Алия Заһидуллина. Кандидатлар идарә итү күнекмәләрен өйрәнәчәкләр һәм уңышлы практик чишелешләр турында беләчәк. Интенсив ахырында катнашучыларга проектлар якларга туры киләчәк. Конкурс комиссиясе кадрлар резервына кертү турында карарны конкурсантларның проектларны тәкъдир итү нәтиҗәләре буенча кабул итәчәк.

Исегезгә төшерәбез, бүгенге көндә Балалар һәм яшьләр эшләре комитеты карамагында – «Подросток» яшәү урыны буенча яшүсмерләр клублары берләшмәсе, Аркадий Гайдар исемендәге Казан яшьләр үзәге, «Ышаныч» балаларга һәм яшьләргә психологик-педагогик ярдәм үзәге, «Дуслык» девиант холыклы балалар өчен социаль-тернәкләндерү үзәге һәм «Ял» балаларны сәламәтләндерүне, ял иттерүне оештыру буенча шәһәр үзәге. Учреждениеләрнең төп бурычы – яшьләр сәясәтен формалаштыру һәм гамәлгә кертү программасын тормышка ашыру, шулай ук төрле яшьтәге балалар һәм яшьләр өчен уңайлы мохит һәм кирәкле шартлар тудыру.