Казан урамнарын кардан чистартуга 230 техника берәмлеге җәлеп ителгән

Бүген Казанда тәүлек буена 25 мм кадәр явым-төшем булачак.

(Казан шәһәре KZN.RU, 25-нче март). Бүген Казанда 230 техника берәмлеге һәм 424 юл эшчесе кар җыештыру эшенә җәлеп ителгән.

Исегезгә төшерәбез, 24-нче март киченнән Татарстанда һава шартларының начараюы күзәтелә – кар, буран, бозлавык. Гидрометеорология үзәге мәгълүматлары буенча, бүген Казанда тәүлек буена 25 мм кадәр явым-төшем булачак.

«Температураның кисәк үзгәрүе һәм явым-төшемнәрнең күп булуы аркасында, иртәнге сәгатьләрдә урам чатларында һәм тукталыш мәйданчыкларында бозлавык һәм кар өемнәре күзәтелде. Әмма әлеге уңайсызлыклар юл хезмәтләре тарафыннан вакытында бетерелде, – дип хәбәр иттеләр шәһәрнең Тышкы төзекләндерү комитетында. – Хәзерге вакытта юлларны һәм тротуарларны чистартуга 230 техника берәмлеге җәлеп ителгән».

Сезон башыннан бирле Казан юлларыннан барлыгы 800 мең тонна кар чыгарылган. Бозлавык булдырмас өчен кышкы чор башыннан бирле бозлавыкка каршы 71,2 мең тонна материал тотылган. Юллардан һәм су басу урыннарыннан кар чыгару эшләре дәвам итә.

Шулай ук укыгыз

Барлык яңалыклар