«Эрмитаж-Казан» үзәгендә импрессионизм чоры рәссамнары турында лекцияләр сериясен укыйлар

Спикер булып Дәүләт Эрмитажының сәнгать белгече һәм фәнни-агарту бүлеге хезмәткәре Алена Петровская чыгыш ясаячак.

Фото: «Казан Кремле» музей-тыюлыгы матбугат хезмәте

(Казан шәһәре KZN.RU, 6 нчы апрель). «Эрмитаж-Казан» күргәзмә үзәгендә импрессионизм чоры рәссамнары турында лекцияләр циклы узачак. Аларның язмышы һәм иҗаты турында сәнгать белгече, Дәүләт Эрмитажының фәнни-агарту бүлеге хезмәткәре Алена Петровская сөйләячәк.

«Куркусыз Берта Моризо» дигән беренче лекция рәссамга, импрессионистларның беренче күргәзмәләрендә катнашкан һәм тәнкыйть белән очрашкан бердәнбер хатын-кызга багышлана. Лекциядә аның тормыш ныклыгы һәм сәнгать осталыгы турында сөйләячәкләр.

Мэри Кассат турында «Америка хатыны Парижда» хикәясе серияне дәвам итәчәк. Мэри Кассат импрессионистлар хәрәкәтенә тиз генә кушылмаган, әмма әлеге Америка-Франция рәссамының иҗаты аның тарихындагы иң якты сәхифәләрнең берсе булган. Аның картиналары ярдәмендә Америка коллекционерлары импрессионистлар эшләре белән кызыксына башлаган.

Цикл ахырында тыңлаучыларга ике рәссамга – Мари Бракмон һәм Ева Гонсалеска багышланган «Хатын-кыз язмышлары» дигән лекция тәкъдим итәчәкләр. Алена Петровская аларның, кыенлыкларны җиңеп, Парижда XIX гасыр урталарында һөнәри танылуга ирешүләре турында сөйләячәк.

Лекцияләр 12 нче, 13 нче, 14 нче апрельдә 10:00 һәм 16:00 сәгатьтә узачак. Керү билетлар буенча башкарыла. Алдан +7(843)567-80-34; +7(843)567-80-32 телефон номерлары буенча язылырга кирәк. Лекцияләрне шулай ук онлайн тыңларга мөмкин булачак, дип хәбәр итә «Казан Кремле» музей-тыюлыгының матбугат хезмәте.

Шулай ук укыгыз

Барлык яңалыклар