Медицина учреждениеләренә 320 мең доза күләмендә яңа вакцина партиясе кайткан.
Фото: Марат Мугинов
(Казан шәһәре KZN.RU, 26-нчы ноябрь, Ксения Швецова). Татарстанда 15 грипп белән авыру очрагы теркәлгән. Шуларның 12 очрагында А (H3N2) тибындагы вирус табылган, дип хәбәр итте бүген «Татар-информ» мәгълүмат агентлыгында узган матбугат конференциясендә ТР буенча Кулланучылар хокукларын яклау һәм кеше иминлеге өлкәсендә күзәтчелек федераль хезмәте идарәсе җитәкчесе урынбасары Любовь Авдонина.
Бүгенге көндә республикада кискен респиратор вируслы инфекцияләр белән авыру дәрәҗәсе югары булып кала, атна саен 20 меңгә якын очрак теркәлә. Гриппның яңа очраклары шулай ук белгечләрдә курку уята. Шул ук вакытта әлегә гомуми Татарстан халкы санының 17%-ы гына прививка ясаткан.
«Гриппка каршы вакцинация дәвам итә, медучрежениеләргә 320 мең доза күләмендә яңа вакцина партиясе кайтты инде. Прививка ясатып өлгермәүчеләргә моны һичшиксез эшләргә кирәк», – дип өстәде Л.Авдонина.