Татарстанда Халыкара СПИДка каршы көрәш көненә багышланган кайнар линия эшли башлаячак

Халыкның сорауларына Кулланучылар хокукларын яклау һәм кеше иминлеге өлкәләрендә күзәтчелек федераль хезмәтенең ТР буенча идарәсе белгечләре җавап бирәчәк.

(Казан шәһәре KZN.RU, 15-нче ноябрь). 25-нче ноябрьдән Татарстанда Халыкара СПИДка каршы көрәш көненә багышланган кайнар линия эшли башлаячак. Республика халкының сорауларына Кулланучылар хокукларын яклау һәм кеше иминлеге өлкәләрендә күзәтчелек федераль хезмәтенең ТР буенча идарәсе белгечләре җавап бирәчәк.

Республика халкы эш көннәрендә 8(843) 238-53-68 телефоны буенча 10.00 сәгатьтән 17.00 сәгатькә кадәр, ял көннәрендә – 8(843) 238-98-54 телефоны буенча 10.00 сәгатьтән 16.00 сәгатькә кадәр сораулар бирә ала. Кайнар линия 1-нче декабрьгә кадәр, Халыкара Спид белән көрәш көне билгеләп үтелә торган көнгә кадәр эшләячәк.

Шул ук чорда ВИЧ-инфекция проблемасы буенча 8-800-555-49-43 телефоны буенча Кулланучылар хокукларын яклау һәм кеше иминлеге өлкәләрендә күзәтчелек федераль хезмәтенең Бердәм консультация үзәгенә шалтыратырга мөмкин булачак.

7-нче ноябрьгә Татарстанда 24 мең 756 ВИЧ-инфекцияле кеше теркәлгән. Шулардан 6635 кеше үлгән, шул исәптән 2110 кеше - ВИЧ-инфекция аркасында. ВИЧ-инфекцияле 3987 кеше республикадан читкә чыгып киткән. ВИЧ белән яшәүче 14 мең 134 кеше диспансер исәбендә тора. Республика халкының ВИЧ-инфекция белән зарарлануы 0,3% тәшкил итә, бу Россия һәм Идел буе федераль округы буенча булган күрсәткечтән 2 тапкыр түбәнрәк (0,6%).

Бу елның 10 аенда республикада ВИЧ белән яшәүче 879 кеше ачыкланган, бу 2018 елның шул ук чоры күрсәткеченнән 11,4%-ка кимрәк. ВИЧ-инфекция очраклары Татарстанның барлык районнарында теркәлгән, Бөгелмә, Әлмәт, Лениногорск, Менделеевск һәм Кама Тамагы районнарында республика күрсәткеченнән артып китү күзәтелә.

Республикада ВИЧ-инфекциясе таралуының үзенчәлеге - үз-үзеңне тотуга бәйле куркыныч янаган төркемнәргә кермәгән урта һәм өлкән яшьтәге затларны эпидемиология процессына актив җәлеп итү, эшкә яраклы ВИЧ-инфекцияле халыкның чагыштырма авырлыгы үсү. Агымдагы елда яңа ачыкланган ВИЧ-инфекциялеләр арасында 70%-ы 30-59 яшьлек кешеләр, өчтән берен ВИЧ-инфекцияле хатын-кызлар тәшкил итте. ВИЧ эпидемиясенең урта яшь төркеменә күчүенең сәбәбе - әлеге контингентның ВИЧ-инфекцияне профилактикалау юллары һәм методлары турында тиешле дәрәҗәдә хәбәрдар булмавы, үзеңнең йогышлану куркынычын тиешенчә бәяләп бетермәү, ВИЧ-инфекциясенә карата кызыксыну булмау.

Татарстанда 18-29 яшьлек яшүсмерләр һәм затлар арасында ВИЧ-инфекция очракларын теркәүне дәвам итәләр. Яшьләр арасында ВИЧ-инфекцияне йоктыруның төп сәбәбе - наркотик препаратларны куллану һәм (яки) рисклы сексуаль тәртип.

Бары ВИЧ-инфекциягә лаборатор тест кына вирусны вакытында ачыкларга һәм авыруны дәвалый башларга мөмкинлек бирә, дип искә төшерә Кулланучылар хокукларын яклау һәм кеше иминлеге өлкәсендә күзәтчелек федераль хезмәтенең ТР идарәсе белгечләре. ВИЧка тест узу тәртибе, түләүсез һәм (яки) аноним тикшерү башкарыла торган медицина оешмалары адреслары турында халыкны планлы диспансерлаштыру кысаларында белергә була.

InfoSPID.ru «ТР Сәламәтлек саклау министрлыгы Республика СПИД һәм йогышлы авыруларны профилактикалау һәм аларга каршы көрәш үзәге» дәүләт автономияле сәламәтлек саклау учреждениесе сайтында һәм (843)272-70-90 ышаныч телефоны буенча ВИЧка медицина тикшерүе узу буенча кызыксындырган сорауларны бирергә мөмкин.

Шулай ук укыгыз

Барлык яңалыклар