Татарстанда бер атна эчендә КРВИ һәм грипп белән авыру 18% ка арткан

Медицина хезмәткәрләре 7658 инфекция йоктыру очрагы теркәгән

Татарстанда җиде көн эчендә КРВИ һәм грипп белән авыруның 7658 очрагы теркәлгән, бу алдагы атна күрсәткечләреннән 18% ка күбрәк. Прививкалар грипптан һәм аның катлаулануларыннан саклауның иң нәтиҗәле ысулы булып кала, шуңа күрә республиканың медицина учреждениеләренә 600 мең дозага якын өч төрле вакцина китерелгән. Бу хакта «Татар-информ» мәгълүмат агентлыгында узган матбугат конференциясендә Роспотребнадзорның ТР буенча идарәсе җитәкчесе урынбасары Любовь Авдонина хәбәр итте.

«Үсешне без өлкәннәр буенча гына күрәбез. Бу өлкәннәр коллективларының балаларныкыннан иртәрәк формалаша башлавы турында сөйли. Ситуация сакланачак: алда мәктәп укучылары коллективлары формалашу тора, шуңа күрә сентябрьнең беренче өч атнасында авыручылар санының аз гына артуы күзәтеләчәк», – дип аңлатты спикер. Ул авыруларны профилактикалау өчен шәхси гигиена кагыйдәләрен үтәргә: кулларны еш юарга, антисептиклар кулланырга кирәклеген искәртте.

2 сентябрьдә мәгариф учреждениеләрендә фильтрлар яңартылачак, алар инфекция йоктыручылар санын киметергә ярдәм итәчәк. Мәктәп һәм балалар бакчалары хезмәткәрләре балаларны катараль күренешләргә (томау, йөткерү) караячак һәм тән температурасын үлчәячәк.

Любовь Авдонина кызамык белән авыручылар санының ел башы белән чагыштырганда 10 тапкырга кимүен билгеләп үтте: «Бу, әлбәттә, республика Сәламәтлек саклау министрлыгы һәм медицина хезмәткәрләре тарафыннан халыкны вакцинацияләү буенча башкарыла торган эш нәтиҗәсе».

Коклюш белән зарарланучылар саны да кимегән: гыйнварда 362, ә августта – 36 очрак теркәлгән. Республикада быел вакцинация өчен куркыныч төркемне билгеләделәр – бу 6-7 яшьлек балалар. 21 мең балигъ булмаган балага прививка ясату планлаштырыла. Спикер сүзләренчә, бүгенгә балаларның 53% ын вакциналаганнар инде. Аның өчен катнаш һәм җиңеләйтелгән «Адасель» препараты кулланыла.

«Бүгенге көндә авыру дәрәҗәсе аның белән идарә итәрлек. Нәкъ менә хәзер вакцина ясатыр вакыт. Прививкалар бушлай үткәрелә», – дип йомгаклады Роспотребнадзорның республика идарәсе җитәкчесе урынбасары. Исегезгә төшерәбез, Казанның алты метро станциясе янында грипп һәм пневмококк инфекциясенә каршы вакцинация пунктлары эшли. 18 яшьтән башлап, теләге булган һәркем прививка ясата ала, үзең белән паспорт алырга кирәк.

Эпидемия сезоны башланганнан бирле республикада геморрагик бизгәк йоктыручылар саны кимеде: теркәлгән очраклар саны узган ел белән чагыштырганда өч тапкырга диярлек кимрәк.

Шуңа да карамастан, Татарстанда узган елның шул ук чоры белән чагыштырганда 22% ка талпан тешләгәннән соң медицина учреждениеләренә мөрәҗәгатьләр саны арткан. Барлыгы 9986 шундый очрак теркәлгән. Сәбәпләр арасында – табигатьтә ял итү һәм талпаннарның таралуына ярдәм итә торган җылы һава торышы. «Үсеш гадәттәгечә август ахырында һәм сентябрь башында күзәтелә. Без саннарның нәкъ менә урманга барганнан соң артуын күрдек, хәзер гөмбә һәм җиләк җыярга йөрү популяр», – дип билгеләп үтте спикер.

Любовь Авдонина республика халкына табигатьтә ял иткәндә профилактика чараларын үтәүнең мөһимлеген искәртеп мөрәҗәгать итте: кием ачык төстә, тыгыз, тәннең ачык өлешләрен максималь каплый торган булырга; аяк киеме табанның арткы ягын һәм тубыкны капларга тиеш; әйберләрне һәм тәннең ачык өлешләрен репеллентлар белән эшкәртергә тәкъдим ителә. Моннан тыш, һәр 15 минут саен үзеңне һәм үзара тикшерүләр үткәрергә кирәк. «Талпан киемгә ябышу белән, өскә үрмәли. Ябышу мизгеленнән кадалуга кадәр 15-20 минут вакыт уза», – дип аңлатты чыгыш ясаучы.

Шулай ук укыгыз

Барлык яңалыклар