Татарстанда 10 апрельдән янгынга каршы махсус режим кертелә

Татарстанда 10 апрельдән янгынга каршы махсус режим кертелә

<p> <img width="870" src="https://www.kzn.ru/upload/iblock/59d/les_pozhar.jpg" height="652"><br> </p> <p> (Казан шәһәре KZN.RU, 7-нче апрель, Ксения Швецова). Татарстанда 10-нчы апрельдән <a href="http://pravo.tatarstan.ru/rus/npa_kabmin/post/?npa_id=555726" target="_blank">янгынга каршы махсус режим</a> эшли башлый, ул 17-нче майга кадәр дәвам итәчәк. Бу чорда республика территориясендә учак ягу, коры үлән һәм чүп-чар яндыру тыела, ә Казанда һәм урманнар белән чиктәш аерым районнарда шулай ук ачык утта азык әзерләргә ярамый. Бу хакта бүген ТР Министрлар Кабинетында узган брифингта Россия Гадәттән тыш хәлләр министрлыгының ТР буенча Баш идарәсе башлыгы урынбасары - Күзәтчелек эшчәнлеге һәм профилактик эш идарәсе башлыгы Сергей Сергеев хәбәр итте. Татарстан башкаласында махсус режим <a href="https://www.kzn.ru/meriya/press-tsentr/novosti/osobyy-protivopozharnyy-rezhim-vvoditsya-v-kazani-s-1-aprelya/" target="_blank">1-нче апрельдән бирле гамәлдә</a> һәм 30-нчы майга кадәр дәвам итәчәк. </p> <p> <b>Татарстанда 96 торак пункт һәм 48 бакчачылык ширкәте исәпкә алынган</b> </p> <p> Җылы, коры көннәр килү белән торак пунктларда, урман паркларында коры үлән һәм чүп-чар януга бәйле янгыннар саны арта. Янгыннарның шактый өлеше узган елгы үләннәрне, саламны, чүп-чарны бакча кишәрлекләрен җыештырганда контрольсез яндыру, табигатькә массакүләм чыгу, урамда учак ягу һәм саксызлык аркасында килеп чыга. Бу табигый һәм урман янгыннары килеп чыгу куркынычы тудыра һәм еш кына авыр нәтиҗәләргә китерә, дип билгеләп үтте С.Сергеев. </p> <p> Янгынга каршы махсус режим вакытында республика территориясендә учак ягу, коры үлән һәм чүп-чар яндыру тыела. Шулай ук янгын куркынычы булган территорияләрдә, шул исәптән Казанда урнашкан торак пунктларда утта, учакларда, мангалларда ризык әзерләргә, пиротехник эшләнмәләр кулланырга ярамый. Республикада урман янгыннары куркынычы янаган 96 торак пункт, 48 бакчачылык ширкәте, 80 балаларны савыктыру лагере, 19 сәламәтләндерү оешмасы һәм урман кишәрлекләре белән чиктәш кайбер икътисад объектлары исәпкә алынды. </p> <p> Республиканың калган территорияләрендә ачык утта азык әзерләү рөхсәт ителә, әмма билгеләнгән кагыйдәләрне үтәү зарур. Шулай итеп, ризыкны билгеле бер урында янмый торган савытларда әзерләргә кирәк. Әзерләү урыныннан алып корылмаларга кадәр кимендә 5 метр булырга тиеш, савыт тирәсендәге территорияне кипкән үләннән һәм чүп-чардан чистартырга кирәк. Ачык утта пешергәннән соң, учак урынын ком белән күмәргә һәм төтенне тулысынча туктатканчы су сибәргә кирәк. </p> <p> <b>Татарстан халкы өчен янгын куркынычсызлыгы кагыйдәләрен бозган өчен штраф 2 мең сумнан 4 мең сумга кадәр тәшкил итәчәк</b> </p> <p> Янгынга каршы махсус режим чорында үләнне һәм чүп-чарны контрольсез яндыруны булдырмау өчен торак пунктларда, бакчачылык ширкәтләре һәм халыкның урманнарга якын күпләп ял итү урыннарында профилактик төркемнәр патрульлек итәчәк. Алар составында - янгын хезмәте, эчке эшләр органнары, җирле үзидарә органнары хезмәткәрләре. С.Сергеев хәбәр иткәнчә, узган ел мондый төркемнәр 1766 коры үлән һәм чүп-чар янып китү очрагын булдырмый калган. Административ җаваплылыкка 240 граждан һәм вазыйфаи зат җәлеп ителгән. </p> <p> Махсус янгынга каршы режим вакытында куркынычсызлык кагыйдәләрен үтәмәгән өчен административ штрафлар күләме 2 тапкырга арта, дип билгеләде С.Сергеев. Гадәти гражданнар өчен бу чорда янгын куркынычсызлыгы таләпләрен бозган өчен штрафлар 2-4 мең сум, вазыйфаи затлар өчен - 15-30 мең сум, эшмәкәрләр өчен - 40 мең сумга кадәр, юридик затлар өчен - 200-400 мең сум тәшкил итә. </p> <p> <b>Казанда ел башыннан 319 янгын булган, шуларның 68-е - махсус режим кертелгәннән соң</b> </p> <p> Узган ел язгы-җәйге чорда Татарстанда янгыннарның кызган чагы апрель ахыры - май башына туры килде. Ул вакытта 687 янгын булган. Аерым көннәрдә янгын сүндерү бүлекчәләре коры үлән һәм чүп-чар янгыннарына тәүлеккә 100-дән артык мәртәбә чыкканнар, диде С.Сергеев. 2019 елда Казан янгын гарнизонының бүлекчәләре янгын мәйданы 2 гектардан артык тәшкил иткән Борисоглебское микрорайонына янгыннарны сүндерүгә чыккан, дип өстәде ул. Шул ук вакытта республиканың кайбер районнарында утның коры үләннән төзелеш корылмаларына: торак йортлар, гаражлар, сарайлар һәм башкаларга күчүенең 10 очрагы теркәлгән. </p> <p> 5-нче апрельгә республикада 1118 янгын теркәлгән, дип хәбәр итте Россия Гадәттән тыш хәлләр министрлыгының ТР буенча Баш идарәсе башлыгы урынбасары. Бу узган елның шул ук чоры белән чагыштырганда 14 процентка күбрәк, ул вакытта 978 янгын булган. Шул ук вакытта янгыннарның күпчелек өлеше - 1068 - 20-нче мартта, беренче җылы көннәр башланганнан соң барлыкка килгән. Аларның 99-ы коры үләннәр, чүп-чар һәм каты көнкүреш калдыклары яну белән бәйле. </p> <p> Коры үлән һәм чүп-чар яндыру аркасында килеп чыккан янгыннарның иң күбе Казанга, шулай ук Чистай, Әлмәт, Түбән Кама һәм республиканың башка районнарына туры килә. </p> <p> Янгыннар санының бик күп булуы аркасында Казанда быел махсус режим 1-нче апрельдән кертелде. «Янгын куркынычы сезоны безнең шәһәрдә тулаем республика белән чагыштырганда иртәрәк башланды, чөнки без катлаулы хәлне күзәтәбез: 2019 елда ел башыннан шәһәрдә 205 янгын булса, быел - 319. Аларның күбесенең сәбәбе - коры үлән һәм чүп-чарны яндыру булды», - дип аңлатты Гражданнарны яклау идарәсе башлыгы Фердинант Тимерханов. </p> <p> Аның сүзләренчә, 319 янгынның 68-е Казанда янгынга каршы режим игълан ителгәннән соң булган. Янгында 7 кеше үлгән, 22 кеше зыян күргән, 13 шәһәр кешесен коткарып кала алганнар. «Бу саннар гына түгел - алар артында кеше гомерләре тора. Шуңа күрә без шәһәрдә яшәүчеләрдән барысының да янгын куркынычсызлыгы кагыйдәләрен үтәүләрен сорыйбыз. Әгәр дә элек без шәһәр халкын кисәткән генә булсак, хәзер барлык хокук бозучылар административ җәзага тотылачак». </p>

2020-04-07T11:45:00+0300