Татарстанда халыкка юридик ярдәм күрсәтү буенча кайнар линияләр эшли

Россия юристлары ассоциациясе вәкилләреннән консультацияләрне эшмәкәрләр дә алырга мөмкин.

(Казан шәһәре KZN.RU, 20-нче май). Татарстанда халыкка, шул исәптән эшмәкәрләргә, юридик ярдәм күрсәтү буенча кайнар линия эшли. «Ярдәм янәшә! Помощь рядом!» республика хәрәкәте кысаларында Россия юристлары ассоциациясенең Татарстан бүлеге вәкилләре консультацияләр бирәчәк.

Халыкны кызыксындырган күпчелек сораулар хезмәт законнарын үтәүгә кагыла. Барлык эш бирүчеләрнең дә үз хезмәткәрләренә эш көне булмаган көннәр өчен түләргә җитәрлек ресурслары юк. Шуңа бәйле рәвештә вакыты чикләнмәгән административ ялларны рәсмиләштерү яки үз теләге белән эштән китәргә мәҗбүр итү тәҗрибәсе шактый киң таралды. Кайнар линия телефоны буенча гражданнар квалификацияле юристларның консультацияләрен ала һәм РФ Хезмәт кодексында беркетелгән хокукларын ничек саклап калырга икәнен белә алачак.

Моннан тыш, татарстанлылар дәүләттән социаль ярдәм алуның нечкәлекләре, балалы гаиләләргә ярдәм чараларын рәсмиләштерү белән, шул исәптән ана капиталы чараларын куллану кысаларында да, кызыксына.

Кече һәм урта эшкуарлык вәкилләре юристлардан субсидияләр алу, ташламалы кредитлар рәсмиләштерү, дәүләт мөлкәте өчен аренда түләвеннән азат ителү мәсьәләләре буенча консультация ала.

«Ярдәм янәшә! Помощь рядом!» проекты кысаларында бушлай консультацияне +7(960)080-90-50 телефоны аша (эш көннәрендә 9.00-дән 18.00-гә кадәр) алырга мөмкин. Эшмәкәрләрнең сорауларына белгечләр түбәндәге телефон буенча җавап бирергә әзер: +7(960)040-70 (эш көннәрендә 9.00-дән 18.00-гә кадәр).

«Татмедиа» агентлыгы хәбәр иткәнчә, Россия юристлар ассоциациясенең Татарстан бүлеге 600 тирәсе хокук өлкәсендә эшләүче белгечне - юристларны, адвокатларны һәм казыйларны берләштерә.

Шулай ук укыгыз

Барлык яңалыклар