Татарстанда көчле салкыннар аркасында шторм кисәтүен озайттылар

10-15 нче гыйнварда Татарстан Республикасында аномаль салкын һава торышы сакланачак

Фото: Денис Гордийко

(Казан шәһәре KZN.RU, 9 нчы гыйнвар). Татарстанда көчле салкыннар аркасында шторм кисәтүен озайттылар. 10-15 нче гыйнварда -18..-24 градуслы уртача тәүлеклек һава температурасы белән аномаль салкын һава торышы сакланачак. Бу климат нормасыннан 9-15 градуска түбән.

Һаваның минималь температурасы нигездә -23..-28 градус тәшкил итәчәк. Урыны белән 11 нче гыйнварда термометр баганасы -33 градуска кадәр төшәчәк. Көндезге максималь температура, 10-15 нче гыйнварда, -16..-21 градус дәрәҗәсендә булыр дип көтелә.

Бүген төнлә Казанда аязучан болытлы һәм явым-төшемсез булачак. Температура -21..-23 градус дәрәҗәсендә торачак, ә аязганда -26 градуска кадәр төшәргә мөмкин. Көндез термометр баганасы -19..-21 градустан югары күтәрелмәячәк. Юлларда бозлавык барлыкка киләчәк.

Элегрәк республикада 4-9 нчы гыйнварда аномаль салкыннар сәбәпле шторм кисәтүе игълан ителгән иде.

Республикада 10 нчы гыйнвар төнендә азрак кар сакланачак, көндез явым-төшем булмаячак. Төнлә һәм иртән -21..-26 градус көтелә, аязганда -30 градуска кадәр, көндез -18 градустан -23 градуска кадәр булачак.

11 нче гыйнварда Татарстанның көнбатышында синоптиклар кар, буран һәм секундына 15-20 метрга кадәр көчле җил фаразлый. Төнлә һава температурасы -24..-29 градус, аязганда -34 градуска кадәр төшәчәк. Синоптиклар көндез -14..-19 градус вәгъдә итәләр. Көнчыгышта -22 градуска кадәр булачак.

Җомга көнне, 12 нче гыйнварда, кар, буран һәм җил булачак, юлларда кар көртләре барлыкка килергә мөмкин. Төнлә температура -16..-21 градус тәшкил итәчәк, көндез -10 нан -15 градуска кадәр булачак.

Беренче ял көнендә, 13 нче гыйнварда, термометр баганалары -22..-27 градус күрсәтәчәк, аязганда -30 градуска кадәр төшәчәк. Көндез -18 дән -23 градуска кадәр җылыта.

Көчле җил белән түбән һава температурасы өшүгә һәм туңуга китерергә мөмкин, дип кисәтә ТР Гидрометүзәге.

Шулай ук укыгыз

Барлык яңалыклар