Татарстанда 71 яңа СОVID-19 очрагы расланды

10 очрак читтән алып кайтылган, калганнары инфекциялеләр белән элемтәдән соң авырый башлаган.

(Казан шәһәре KZN.RU, 26-нчы апрель). Татарстанда 71 яңа COVID-19 очрагы расланды. 11 пациент хастаханәгә озатылды, 60 кеше өйдә дәвалана - аларның авыруы җиңел яки симптомсыз формада уза.

10 очрак читтән алып кайтылган, калганнары инфекциялеләр белән элемтәдән соң авырый башлаган, дип хәбәр итә коронавирус белән көрәш буенча республика штабы. Яңа зарарланучылар арасында балигъ булмаганнар - 4-әү, 18 яшьтән 30 яшькә кадәр - 4 кеше, 30 яшьтән 50 яшькә кадәр - 21 кеше, 50 яшьтән 60 яшькә кадәр - 18 кеше, 60 яшьтән 70 яшькә кадәр - 17 кеше, 70 яшьтән 80 яшькә кадәр - 4 кеше һәм 80 яшьтән 90 яшькә кадәр - 3 кеше.

Авыручыларның күбесе Казанда яши - 38 кеше, 7 инфекцияле кеше - Түбән Кама районында, 5-се - Балтач районында, 4-се - Яр Чаллыда, 3-әр кеше - Лаеш һәм Питрәч районнарында, 2-шәр кеше - Арча, Биектау һәм Саба районнарында, берешәр кеше - Буа, Алабуга, Яңа Чишмә, Сарман һәм Чистай районнарында.

Соңгы тәүлек эчендә республикада 3 пациент сәламәтләнгән, алар барысы да Яр Чаллыда дәваланган.

Татарстанда яңа коронавирус чире белән зарарланучыларның гомуми саны 562 кешегә җиткән, шуларның 57-се сәламәтләнгән, табиблар күзәтүе астында 505 кеше кала.

Тәүлек эчендә республикада коронавируска 2705 тест уздырылган, тикшеренүләр башланганнан бирле - 40 мең 792 тест. Хәзерге вакытта медицина күзәтүе астында 1742 кеше тора, 22 мең 249 кеше медицина күзәтүеннән төшкән.

Россиядә соңгы тәүлектә авыруның 6361 яңа очрагы теркәлгән, авыруларның гомуми саны 80 мең 949 кешегә җиткән. 6767 кеше сәламәтләнгән, 747 пациент үлгән, дип хәбәр итә федераль оператив штаб.

Шулай ук укыгыз

Барлык яңалыклар