Татарстанда COVID-19га шикле булган 850 кеше медицина күзәтүе астында тора

Узган тәүлектә республикада коронавирус инфекциясе белән авыруның 27 очрагы ачыкланган.

(Казан шәһәре KZN.RU, 1-нче сентябрь, Ксения Швецова). Татарстанда бүген ковид инфекциясе белән авырган кешеләр белән элемтәдә булган 850 кеше медицина күзәтүе астында тора. Республикада санитар-эпидемиологик вәзгыять турында «Татар-информ» мәгълүмат агентлыгында матбугат конференциясендә Кулланучылар хокукларын яклау һәм кеше иминлеге өлкәсендә күзәтчелек федераль хезмәтенең ТР идарәсе җитәкчесе урынбасары Любовь Авдонина һәм Татарстан Республикасы сәламәтлек саклау министры урынбасары – Татарстан Республикасы Сәламәтлек саклау министрлыгының Казан буенча идарәсе башлыгы Владимир Жаворонков сөйләде.

Узган атнада республикада 358 авыру белән элемтәдә булган 104 «йорт инфекциясе урыны» теркәлгән. Шулай ук авыру очраклары 35 хезмәт коллективында теркәлгән, аларда 78 кеше инфекцияле кешеләр белән элемтәдә булган. Бүгенге көндә медицина күзәтүе астында барлыгы 850 кеше кала, дип хәбәр итте Л.Авдонина.

Узган тәүлектә республикада коронавирус инфекциясе белән авыруның 27 очрагы ачыкланган, пандемиянең бөтен чорында – 6536 очрак, 100 мең кешегә бу күрсәткеч 175% тәшкил итә.

«Элеккечә үк авырулар санының гомуми структурасында балалар 4,5% тәшкил итә, – дип өстәде Кулланучылар хокукларын яклау һәм кеше иминлеге өлкәсендә күзәтчелек федераль хезмәтенең ТР идарәсе җитәкчесе урынбасары. – Төп өлеш – 48% диярлек – 40 яшьтән 64 яшькә кадәрге кешеләргә туры килә. 65 яшьтән өлкәнрәк пациентлар йоктыручыларның гомуми санының 17%-ын тәшкил итә».

ОРВИ тибы буенча җиңел формада авыру 41% авыруда бара, авыручыларның 30%-ы вирусны симптомнарсыз кичерә. Больницадан тыш үпкә ялкынсынуы диагнозын пациентларның 28,5%-ына куйганнар.

«Тәүлек эчендә 59 кеше савыкты, барлык чорда – 5356 кеше», – дип хәбәр итте Татарстан Республикасы сәламәтлек саклау министры урынбасары Владимир Жаворонков. «Планлы ярдәм күрсәтү өчен Республика клиник хастахнәсендәге травма үзәге ачылды, хәзер ачылуга 16-нчы хастаханә әзерләнә, – дип өстәде ул. – COVID-19лы пациентлар хастаханәдән чыккач, хастаханәдә тулы дезинфекция үткәрәчәкләр, шуннан соң ул планлы пациентларны кабул итә алачак».

Республиканың халыкара аэропортларында санитар-карантин контроле дәвам итә. Бүгенге көндә аны 39 һава судносы, шул исәптән Төркиядән очып килгән ике самолет узган. Барлыгы республикага 5480 кеше килгән, аларның барысының да температуралары үлчәнгән һәм берсендә дә ковид ачыкланмаган.

«21-нче августтан башлап коронавируска тестны Казан аэропортында ук тапшырырга мөмкин, – дип билгеләде Любовь Авдонина. – Бүгенгә тестлаштыруны 3034 кеше узды».

Исегезгә төшерәбез, чит илдән кайткан вакыттан алып өч көн эчендә республика халкы, һичшиксез, коронавируска тест узарга һәм аның нәтиҗәләрен дәүләт хезмәтләре порталына йөкләргә тиеш.

«Әлеге таләпне үтәмәгән өчен административ җаваплылык каралган – 15 мең сумнан 40 мең сумга кадәр штраф», – дип ассызыклады Л.Авдонина. Бүген, аның сүзләренчә, порталда 4700 кешенең тест нәтиҗәләре беркетелгән, күрсәтелгән таләпне әлегә 590 кеше үтәмәгән.

Шулай ук укыгыз

Барлык яңалыклар