Казан марафоны үткәрелү сәбәпле, берничә урамда транспорт хәрәкәте чикләнәчәк

Шулай ук кайбер автобусларның һәм троллейбусларның хәрәкәт схемалары да үзгәрәчәк.

Фото: Денис Гордийко фотосы

(Казан шәһәре KZN.RU, 9-нчы октябрь). Казан марафонын әзерләү һәм уздыру вакытында Татарстан башкаласында транспорт хәрәкәте чикләнәчәк һәм кайбер автобусларның һәм троллейбусларның хәрәкәт схемалары үзгәртеләчәк.

Аерым алганда, транспорт хәрәкәте өчен шәһәр үзәгендәге юллар участоклары ябылачак: Кремль яр буе, Уң як Болак һәм Сул як Болак, Чернышевский, Сәет Галиев, Сәлимҗанов һәм башкалар, шулай ук «Үзәк» һәм «Ак Барс Арена» стадионнары янындагы территория, Кремль дамбасы һәм Миллениум күпере.

Моннан тыш, 6, 15, 22, 28, 28а, 29, 35, 35а, 37, 43, 54, 74, 89 номерлы автобус маршрутларының һәм 7-нче номерлы троллейбус маршрутының хәрәкәт итү схемалары вакытлыча үзгәрәчәк.

Исегезгә төшерәбез, 10-нчы октябрьдә Казанда Россиядә иң зур йөгерү бәйрәме - «Милләт кроссы» узачак. Анда 10 меңнән артык кеше катнашыр, дип көтелә. Татарстан Республикасы башкаласында «Милләт кроссы» трассасы «Ак Барс Арена» территориясе буйлап узачак. Программада 1 чакрым, 2 чакрым һәм 3 чакрым дистанциягә йөгерү каралган. Ярышлар 9.00 сәгатькә планлаштырылган.

Татарстан башкаласында йөгерү сезоны 11-нче октябрьдә Казан марафоны белән тәмамланачак. Профессиональ спортчылар һәм һәвәскәрләр маршрут буенча шәһәрнең төп истәлекле урыннары – Кабан күле, Меңьеллык паркы һәм Казан Кремле – тирәли йөгерәчәк. Ярышлар Үзәк стадионда 7.00 сәгатьтә башлана.

Шулай ук укыгыз

Барлык яңалыклар