Татарстан башкаласында эшсезлек дәрәҗәсе 0,62% ка кадәр кимегән

Бүгенге көндә төзелеш һәм завод һөнәрләре эшчеләренә, эретеп ябыштыручыларга, электромонтерларга, монтажчыларга ихтыяҗ зур.

Фото: Марат Мөгыйнов

(Казан шәһәре KZN.RU, 14 нче ноябрь, Диана Жиленкова). Ел башыннан Казанда эшсезләр саны 4671 кешедән 4010 кешегә кадәр кимегән. 19 меңнән артык эш урыны шәһәрнең 1760 эре, урта һәм кече оешмасын тәкъдим итәргә әзер. Эшсезлек дәрәҗәсе 0,73% тан 0,62% ка кадәр кимегән, дип хәбәр итте эшлекле дүшәмбедә шәһәр Башкарма комитеты җитәкчесе урынбасары Илдар Шакиров.

«Ел башыннан шәһәр мәшгульлек хезмәтләре һәм уку йортлары белән әйдәп баручы предприятиеләрне квалификацияле кадрлар белән тәэмин итү буенча эш алып барылды», – дип аңлатты ул.

Шәһәр Башкарма комитеты җитәкчесе урынбасары сүзләренә караганда, икътисад үсешенең хәзерге геосәяси шартларында җитештерү ихтыяҗлары өчен белгечлекләрнең өлешчә трансформациясе булган. Барыннан да элек, сүз оборона-сәнәгать комплексына юнәлдерелгән һөнәрләр турында бара. Спикер билгеләп үткәнчә, хәзерге вакытта төзелеш һәм завод һөнәрләре эшчеләре, эретеп ябыштыручылар, электромонтерлар, монтажчылар, токарьлар һәм станок операторларына ихтыяҗ зур.

Эшсезлек дәрәҗәсенең тагын да кимүенә өстәмә резервлар да ярдәм итәчәк. Шәһәрнең 1760 эре, урта һәм кече оешмасы 19 меңнән артык эш урыны тәкъдим итәргә әзер. «Вакансияләр структурасында 60% тан артык эшче белгечлекләр буенча вакансияләр бар, хезмәткәр белгечлекләре вакансияләрнең гомуми саныннан нибары 40% кына алып тора», – дип билгеләде И.Шакиров.

Демография өлкәсендә дә уңай динамика күзәтелә, дип өстәде ул. Әйтик, халыкның табигый артуы саклана, ә чикләүләрне гамәлдән чыгару аркасында миграция үсеше арткан.

«Социаль-икътисадый һәм җитештерү мөнәсәбәтләрен интеграцияләүнең хәзерге геосәяси шартларында тугыз ай йомгаклары буенча шәһәр икътисады тотрыклы үсеш темпларын күрсәтүне дәвам итә, ә эшләнгән запас ныклыгы һәм формалаштырылган резервлар агымдагы һәм тотрыксыз процессларга оптимистик җавап бирергә, шулай ук ел йомгаклары буенча уңай фаразлар бирергә мөмкинлек бирә», – дип йомгаклады Башкарма комитет җитәкчесе урынбасары.