Татарстан башкаласында Зур Казан боҗрасы участогында төзелеш-монтаж эшләре алып барыла

Объектта һәркөнне 30 берәмлек техника һәм 60 эшче эшли.

Фото: Денис Гордийко

(Казан шәһәре KZN.RU, 16 нчы март, Дмитрий Никитин). Казанда Мехчылар урамында Магистраль урамыннан Девятаев урамына кадәрге участокта Зур Казан боҗрасы төзелеше дәвам итә. Көн саен объектта 27 берәмлек техника һәм 58 эшче эшли, дип хәбәр иттеләр Казан Башкарма комитетының Тышкы төзекләндерү комитетында.

Бүгенге көндә объектта грунтны эшкәртү, шпунтны төшерү һәм чыгару, шулай ук җирле газүткәргечне, су белән тәэмин итү, электр белән тәэмин итү, хуҗалык-көнкүреш һәм яңгыр сулары канализациясен төзекләндерү эшләре бара. Эшчеләр шулай ук аскы ком катламын җәяләр һәм бордюр ташларын урнаштыралар.

Исегезгә төшерәбез, Зур Казан боҗрасы участогының озынлыгы 1,7 км тәшкил итәчәк, юл дүрт хәрәкәт полосасыннан торачак. Эшләрнең заказчысы – «Главтатдортранс» дәүләт казна учреждениесе, генподрядчысы – «Волгадорстрой» җаваплылыгы чикләнгән җәмгыяте.

2021 елның 2 нче декабреннән башлап Казанда автомобильләр һәм җәяүлеләр хәрәкәте өчен реконструкция белән бәйле рәвештә Мехчылар урамының бер өлеше ябылды, транспорт өчен әйләнгеч юл ачылды. Ел башында Зур Казан боҗрасының әлеге участогында эш барышын Казан Мэры Илсур Метшин тикшереп кайтты. Шәһәр башлыгы яңа участок Зур Казан боҗрасының мөһим өлеше генә булып калмыйча, башкаланың тулы бер районын үстерү өчен зур перспективалар ача, дип билгеләп үтте.

Шулай ук укыгыз

Барлык яңалыклар