ТР башкаласында «Гаилә юл күрсәткече» проектын башлап җибәрделәр

Аның кысаларында 18-35 яшьлек гаилә парларына психологик ярдәм күрсәтеләчәк

Фото: Денис Гордийко

«Доверие» психология үзәге «Гаилә юл күрсәткече» проектын башлап җибәрде. Анда 18 яшьтән алып 35 яшькә кадәрге ир белән хатын катнаша ала, дип хәбәр иттеләр Казанның балалар һәм яшьләр эшләре комитетында.

Проект яңа гына мөнәсәбәтләр урнаштыра башлаган яшь парлар өчен файдалы булачак. Сайлап алуда шулай ук балалы гаиләләр яки бала алып кайтырга планлаштыручы ир белән хатын, конфликтлы ситуацияләрдә яки гаилә таркалу этабында булган парлар катнашырга мөмкин.

Проект программасына шәхси һәм гаилә консультацияләре, медиацияләр, тренинглар һәм мастер-класслар кергән. Шулай ук чакырылган белгечләр белән очрашулар һәм төрле ял чаралары узачак.

Гаилә парларына шәһәрнең алты мәйданчыгында: «Компас» (М.Сәлимҗанов ур., 14), «Выбор» (2 нче Юго-Западная ур., 32), «Таяныч» (Сигезенче Март ур., 4), «Сердәш» (Годовиков ур., 14), «Ювента» (Ф.Әмирхан ур., 2) психология хезмәтләрендә, муниципаль татулык хезмәтендә (С.Халтурин ур., 16) ярдәм күрсәтеләчәк.

Проектта катнашу өчен урнашу урыны буенча үзегезгә уңайлы хезмәтне сайларга һәм берләшмә администраторларына «Гаилә юл күрсәткече»ндә катнашырга телим» дигән хәбәр юлларга кирәк.

Проект Татарстан шәһәрләрендә һәм районнарында яшьләр проектларын гамәлгә ашыруга яшьләр сәясәте муниципаль учреждениеләре арасында грантлар конкурсы кысаларында гамәлгә ашырыла.

Шулай ук укыгыз

Барлык яңалыклар