ТР башкаласында «Казанның яңа педагогик сыйныфы» проекты старт алды

Октябрь аенда педагогик сыйныф укучылары КФУда педагогика, психология һәм әйдаманлык осталыгы нигезләрен өйрәнә башлаячаклар.

Фото: Мәгариф идарәсе

(Казан шәһәре KZN.RU, 26 нчы сентябрь). Узган ялларда «Казанның яңа педагогик сыйныфы» һөнәри белем бирү проекты старт алды. КФУның Филология һәм мәдәниятара багланышлар институтында узган тантаналы чарага шәһәрнең 19 мәктәбеннән 400 дән артык укучы җыелды.

«Казанның яңа педагогик сыйныфы» программасын 25 гомуми белем бирү оешмасы базасында гамәлгә ашыралар. Шуларның 21 е өчен КФУның Филология һәм мәдәниятара багланышлар институты остаз булачак. Проект кысаларында педагогик сыйныф укучылары октябрьдә үк югары уку йортында педагогика, психология һәм әйдаманлык осталыгы нигезләрен өйрәнә башлаячаклар. Аларга студент-кураторлар, шул исәптән – йөз балл җыючылар, олимпиадаларда, конференцияләрдә, иҗади һәм проект конкурсларында җиңүчеләр ярдәм итәчәк. Уку процессы ике ел дәвам итәчәк.

Проектта катнашучыларны КФУның Филология һәм мәдәниятара багланышлар институты директоры Рәдиф Җамалетдинов, ТР Фән һәм мәгариф министрлыгының өстәмә һөнәри белем бирү бүлеге башлыгы Роза Шәяхмәтова, Казан Башкарма комитетының Мәгариф идарәсендәге әйдәп баручы белгече Эльмира Кабудинова, 8 нче гимназия директоры Марина Пичугина һәм 187 нче лицей директоры Гөлнара Галиева сәламләде.

Педагогик классларны узган елның декабрендә ТР Мәгариф һәм фән министрлыгы коллегиясендә оештырырга булганнар. Бу инновацион педагогик эшчәнлеккә сәләтле югары квалификацияле белгечләр әзерләү проблемасын хәл итәргә һәм җәмгыятьтә укытучы һөнәренең дәрәҗәсен күтәрергә ярдәм итәчәк, дип хәбәр иттеләр шәһәрнең Мәгариф идарәсендә.

Исегезгә төшерәбез, бу уку елында психологик-педагогик юнәлештәге класслар Казанның 25 мәктәбендә – 6 нчы, 10 нчы, 12 нче, 52 нче гимназияләрдә, 71 нче, 117 нче, 119 нчы, 143 нче һәм башка мәктәпләрдә ачылды. Профильле сыйныф укучылары педагогика һәм психология нигезләре белән танышачаклар, проект эшчәнлеге күнекмәләрен үзләштерәчәкләр, үзләрен мәктәп яны лагеренда әйдаманнар сыйфатында сынап караячаклар һәм башлангыч сыйныфларда педагогик практика узачаклар.

Моннан тыш, «Университет шимбәсе» проекты кысаларында укучылар югары уку йортларын тәмамлаучылар һәм укытучылар белән аралаша алачаклар, алар өчен психология һәм педагогика буенча мастер-класслар әзерләгәннәр.

Уку процессы КФУның чит телләр һәм тәрҗемә итү югары мәктәбе, Педагогика һәм психология институты, Филология һәм мәдәниятара багланышлар институты, шулай ук В.Г.Тимирясов исемендәге Казан инновацион университеты ярдәме белән тормышка ашырылачак.

Шулай ук укыгыз

Барлык яңалыклар