Киләсе елда Татарстанда 15 яңа җиһазландырылган пляж барлыкка киләчәк

Аларның гомуми саны 71 гә кадәр артачак

Фото: Денис Гордийко

(Казан шәһәре KZN.RU, 3 нче ноябрь, Диләрә Гафурова). Җәйге су коену сезоны нәтиҗәләре буенча Татарстанда 62 вакыйга теркәлгән, нәтиҗәдә 52 кеше, шул исәптән алты бала һәлак булган. 31 зыян күрүче коткарылган, дип хәбәр итте «Татар-информ» матбугат конференциясендә ТР кече үлчәмле суднолар буенча баш дәүләт инспекторы Юрий Венедиктов.

Аның сүзләренчә, күрсәткечләр кими. Мәсәлән, 2022 елда су коену сезонында 57 татарстанлы һәлак булган, шул исәптән тугыз бала, 50 кеше коткарылган. Һәлакәтләрнең төп сәбәбе – җиһазландырылмаган урыннарда су коену.

«Туризм һәм кунакчыллык индустриясе» илкүләм проекты буенча ТР Туризм буенча дәүләт комитеты быел юридик затларга һәм эшмәкәрләргә әлеге өлкәдә инфраструктураны үстерүгә республика бюджетыннан субсидияләр бирү буенча конкурс үткәрде. Нәтиҗәләр буенча пляжлар төзү буенча 22 проект гамәлгә ашырыла, быел җиде проект гамәлгә ашырылган.

«Ел дәвамында куркынычсызлык таләпләре нигезендә җиһазландырылган пляжлар санын арттыру буенча эш дәвам итте. Агымдагы йөзү сезонында 56 пляж декларацияләнде, бу узган ел белән чагыштырганда сигезгә күбрәк. Киләсе елда пляжларның тагын 15 кә артуын көтәбез. Аларның санын 71 гә кадәр арттырырга планлаштырабыз», – дип хәбәр итте Юрий Венедиктов.

Шулай ук укыгыз

Барлык яңалыклар