Салават Күперендә физкультура-сәламәтләндерү комплексы барлыкка киләчәк

Бинада мини-футбол һәм волейбол өчен мәйданчыклар, йога һәм фуд-корт өчен зал җиһазландырылачак – үзәккә бер сменада 64 кеше килә алачак

Фото: Марат Мөгыйнов

Казанның Киров районы Салават Күпере торак районында «ФИЗРА спорт үзәге» физкультура-сәламәтләндерү комплексы барлыкка киләчәк. Кичә «Казаноргсинтез» предприятиесе коллективы белән очрашуда объектны төзү планнары турында шәһәр мэры Илсур Метшин хәбәр итте. Спорт комплексына бер сменада 64 кеше килә алачак дип фаразлана.

«ГИС Торги» сайтында басылган мәгълүматларга караганда, бинада манеж, фуд-корт, гардероб һәм ресепшен, тренерлар кабинеты һәм чишенү-киенү бүлмәләре, тренажер залы, санитария бүлмәләре һәм сауна, йога һәм бию белән шөгыльләнү өчен заллар, медицина процедураларын үткәрү өчен табиб кабинеты, инвентарь бүлмәләре һ.б. урнашачак.

Манеж территориясе 4 меңнән 5 мең кв.м. кадәр мәйданны биләячәк. Мәйданны өч кырга бүләчәкләр: икесе – мини-футбол өчен, тагын берсе – волейбол һәм баскетбол өчен. Манежда капкалар, челтәрләр һәм боҗралар урнаштырылачак, ә идән ясалма үлән һәм спорт линолеумы белән капланачак. Залны вандаллыкка каршы светодиодлы яктырткычлар яктыртачак.

Спорт комплексы төзелеше проекты буенча алты җылытыла торган киенү бүлмәсе каралган, аларның һәрберсендә душ бүлмәләре белән үз санитария бүлмәсе булачак. Бинада элгечләр һәм утыргычлар белән киенү урыннары җиһазландырыла.

Моннан тыш, үзәкне кардио-тренажерлар белән җиһазландыру планлаштырыла: биналарда велотренажер, йөгерү юлы, эллиптик тренажер, степпер һәм ишкәкле тренажер урнаштырылачак.

15 нче мартка кадәр концессия килешүе төзү турында тәкъдимнәр кабул ителә – торгларда җиңүче объектны төзү һәм эксплуатацияләү белән шөгыльләнәчәк.

Шулай ук укыгыз

Барлык яңалыклар