Ратушада «Иске Казан» проектын тормышка ашыруга йомгак ясадылар

Шәһәрнең 18 тукталышында сугыш елларында казанлыларның һәм предприятиеләрнең хезмәт батырлыгы турында мәгълүмат стендлары урнаштырылган.

Фото: Марат Мугинов

(Казан шәһәре KZN.RU, 24-нче декабрь). Ратушада Татарстан башкаласына «Хезмәт батырлыгы шәһәре» дигән мактаулы исем бирүгә багышланган «Иске Казан» партия проектын тормышка ашыруга йомгак ясадылар.

Утырыш «Бердәм Россия» партиясенең Казан бүлеге башкарма секретаре, ТР Дәүләт Советы депутаты Ольга Воронова рәислегендә һәм РФ Дәүләт Думасы депутаты Ольга Павлова, шәһәр Думасы депутатлары, шәһәрнең эре сәнәгать предприятиеләре җитәкчеләре, мәдәният учреждениеләре, иҗтимагый оешмалар вәкилләре катнашында узды.

Очрашуны ачып, Ольга Воронова билгеләп үткәнчә, 2020 ел тарихка истәлекле юбилейлар елы - ТАССРның 100 еллыгы һәм Бөек Җиңүнең 75 еллыгы буларак кына түгел, ә авыр сынаулар чоры буларак та керәчәк. Катлаулы шартларга карамастан, Казанда барлык бәйрәм чаралары тиешле дәрәҗәдә узды.

Моннан тыш, шәһәрнең меңьеллык тарихында тагын бер мөһим вакыйга барлыкка килде. Казан «Хезмәт батырлыгы шәһәре» дигән мактаулы исемгә лаек булды. Ольга Павлова билгеләп үткәнчә, Татарстан башкаласы лаеклы рәвештә әлеге мактаулы исемне алды - сугышның беренче көннәреннән шәһәр масштаблы эш алып барган, һәм барлык ресурслар фронт ихтыяҗларына юнәлдерелгән. Бу чорда шәһәрнең 139 предприятиесе хәрби җайга салынган. Илнең үзәк һәм көнбатыш районнарыннан Казанга 70-тән артык предприятие эвакуацияләнгән.

Шәһәргә мактаулы исем бирелү сәбәпле, «Иске Казан» партия проекты кысаларында партиянең җирле бүлекчәсе шәһәр тукталышларында фронт өчен продукция чыгаруга зур өлеш керткән предприятиеләр турында мәгълүмат белән стендлар урнаштыру инициативасы белән чыкты. Нәтиҗәдә, 18 тукталышта Татарстан предприятиеләре һәм оешмаларының хезмәт батырлыгы турында сөйли торган стендлар урнаштырылды.

Очрашу азагында «Мин Казанны беләм» викторинасында җиңүчеләргә дипломнар һәм истәлекле бүләкләр тапшырылды, ул партиянең җирле бүлеге тарафыннан Татарстан башкаласына «Хезмәт батырлыгы шәһәре» исеме бирелү уңаеннан уздырылды.

Шулай ук укыгыз

Барлык яңалыклар