Горький шоссесын реконструкцияләү кысаларында Казанда ике суүткәргеч яңадан кисеп тоташтырыла

«Водоканал» МУП белгечләре төзелеш-монтаж эшләренә керештеләр

Фото: Денис Гордийко

(Казан шәһәре KZN.RU, 21 нче октябрь). ТР башкаласында сигез ноктада ике магистраль суүткәргеч яңадан кисеп тоташтырыла. «Водоканал» МУП белгечләре төзелеш-монтаж эшләренә керештеләр. Бу Горький шоссесын реконструкцияләү белән бәйле.

Тоташтыру эшләре кичә башланды. Шуңа бәйле рәвештә шәһәрнең елга аръягында суны сүндерәләр. Гомумән алганда, эш 40 сәгатьтән артык вакыт алыр дип көтелә. 30 берәмлек техника һәм 60 кеше җәлеп ителгән.

Элегрәк Горький шоссесын реконструкцияләү кысаларында диаметры 1,2 мең мм булган 800 метр озынлыктагы ике магистраль суүткәргеч чыгарылган булган, алар юл астында булган. Кулланучыларны яңа челтәрләргә күчерү соңгы этап булды. Хәзер суүткәргечләр йөрү өлеше астында түгел, ә аның яныннан узачак, һәм авария очрагында юл полотносын ачарга туры килмәячәк.

Бөтен процесс өч этапка бүленгән. Моңа кадәр 8 км торба үткәргеч бушатылган булган. Икенче этап – иң катлаулы һәм дәвамлысы – төзелеш-монтаж эшләре. Соңгы этапта системаны тутыру, пресслау, Россия кулланучылар күзәтчелегенә су пробалары тапшырып, үткәргеч торбаларны дезинфекцияләү булачак.

Иртәгәсе көннең 12:00 сәгатенә кадәр су булмаячак. Сүндерү 1788 күп фатирлы йортка, 10 мең шәхси торак йортка, 124 балалар бакчасына, 69 мәктәпкә, 12 хастаханәгә һәм поликлиникага, 22 котельныйга, 29 кунакханәгә һәм 620 административ бинага кагылачак.

Бу чорда «Водоканал» 24 су ташый торган машинаны җәлеп итә, шуларның 20 се алдан билгеләнгән график буенча йөриячәк, тагын дүртесе өстәмә ашыгыч гаризалар очрагында резервта булачак. Иң якын машинаның кайда урнашканын +7(843)231-62-70 телефоны буенча белергә мөмкин. Кайнар линия эш тәмамланганчы тәүлек әйләнәсе эшли.

Исегезгә төшерәбез, Горький шоссесын реконструкцияләү узган ел башланды, аны 2024 елның октябрендә тәмамларга планлаштыралар. 11 км озынлыктагы очыш магистрале светофорсыз булачак, ә үткәрү сәләте сәгатенә 11 мең транспорт берәмлегенә кадәр – ике тапкыр диярлек артачак. Юлны алты полосага кадәр (һәр якка өч) киңәйтү каралган.