Узган ел «Россия эше» порталында Казан эш бирүчеләренең 1,2 меңнән артык тәкъдиме урнаштырылган

Югары уку йортларында белем алуга федераль максатчан квота кысаларында 2 меңнән артык шартнамә төзелгән

Денис Гордийко фотосы

Узган ел «Россиядә эш» порталында Казан эш бирүчеләренең 1287 тәкъдиме урнаштырылган, алар буенча 2268 килешү төзелгән, шул исәптән 2080 е – югары уку йортларында белем алуга федераль максатчан квота кысаларында. Бу хакта шәһәр Башкарма комитетында узган аппарат киңәшмәсендә ТР Халыкны эш белән тәэмин итү үзәге директоры Тимур Муллин хәбәр итте.

Дәвалау эше, педиатрия, педагогика, ветеринария, агроинженерия, электр энергетикасы, химия технологиясе, машина төзелеше, гамәли информатика һәм мәгълүмати куркынычсызлык максатчан укытуның иң зур ихтыяҗлы юнәлешләре булган.

Спикер билгеләп үткәнчә, шәһәрдә һөнәрләрнең җәлеп итүчәнлеген арттыру һәм аларны популярлаштыру өчен тематик ярминкәләр һәм чаралар үткәрелә. Шул исәптән «Һөнәре буенча иң яхшысы» бөтенроссия һөнәри осталык конкурсы, Бөтенроссия эшкә урнаштыру ярминкәсе, Һөнәрләр фестивале.

Быел «Россия эше. Мөмкинлекләр вакыты» ике этапта узды: апрельдә «УНИКС» мәдәни-спорт комплексы базасында төбәк этабы үтте. Анда шәһәрнең 80 нән артык сәнәгать һәм җитештерү предприятиеләре һәм оешмалары катнашты, шуларның 17 се – оборона-сәнәгать комплексы предприятиеләре, шулай ук 10 урта һәм югары белем бирү уку йорты. Чарага 6 меңгә якын граждан килде, 600 дән артык кеше эшкә урнаштырылды, дип хәбәр итте Тимур Муллин.

Әйтик, Яшьләр көнендә, 28 июньдә, «Урам» экстрим-паркында «Россия эше. Мөмкинлекләр вакыты» вакансияләр ярминкәсенең федераль этабы узды. Анда 40 оешма 3 меңнән артык актуаль вакансия тәкъдим итте. Ярминкәгә 27 меңгә якын кеше килгән.

Моннан тыш, 27 июньдә вакансияләр ярминкәсе кысаларында «Икенче старт» махсус номинациясендә «Һөнәре буенча иң яхшы» һөнәри осталык конкурсы узды. Федераль этапта өченче урынны алган Казан метрополитены электропоезды машинисты Станислав Нижегородцев төбәк этабында җиңүче булды. «Слесарь-җыючы» номинациясендә Казан вертолет заводы слесарь-ремонтчысы Азат Сибгатуллин җиңде, ул югары әзерлек дәрәҗәсен күрсәтте.

Шулай ук сентябрьдә Казанда «Һөнәре буенча иң яхшы» конкурсының «Радиоэлектрон аппаратура монтажчысы» номинациясендә федераль этабы тәмамланды, анда «Айсиэл Электроникс» җаваплылыгы чикләнгән җәмгыятенең кул белән монтажлаучысы һәм ремонтлау участогы мастеры Инсаф Сибгатов көмеш медаль яулады. Казан вертолет заводы слесарь-корал ясаучысы Дамир Касыймов федераль дәрәҗәдә Смоленск өлкәсендә «Слесарь-корал ясаучы» номинациясендә көмеш призер булды.