Казанның мәктәп яны лагерьларында быел якынча 16,8 мең бала ял итәчәк

Балаларны тематик атналар көтә: алар театрларга, музейларга һәм мастер-классларга йөреячәк

Фото: Денис Гордийко

Бүген Казанның 157 гомуми белем бирү учреждениесендә мәктәп яны лагерьлары ачылды. Бу җәйдә алар 16,8 мең баланы кабул итәчәк. Мәктәпләрдәге активлыклардан тыш, балалар, барлык куркынычсызлык чараларын үтәгән хәлдә, театрларга һәм музейларга, мастер-классларга һәм уен бүлмәләренә барачак. Лагерьлар 22 нче июньгә кадәр эшләячәк, дип хәбәр итте Башкарма комитетта узган эшлекле дүшәмбедә мәгариф идарәсе башлыгы Ирек Ризванов.

Укучылар өчен «Мәктәпле җәй» чаралар программасы оештырылган, аның кысаларында һәр атна нинди дә булса бер темага багышлана. Әйтик, иминлек, Россиядә Гаилә елы, Татарстанда фәнни-технологик үсеш елы, Бөек Ватан сугышында Җиңүнең 79 еллыгы. Башлангыч мәктәп укучылары өчен исә «Россия бөркетләре берлеге» дигән махсус тема сайланган.

«Каникуллар башланганчы, учреждениеләрдә куркынычсызлык көннәре, сыйныф сәгатьләре, юлларда, урамда һ.б. урыннарда үз-үзеңне тоту кагыйдәләрен формалаштыруга юнәлдерелгән чаралар үткәрелә. Эш компетентлы структуралар – ЮХИДИ, Гадәттән тыш хәлләр министрлыгы һәм башкалар белән бергә алып барыла», – диде Ирек Ризванов.

Быел мәктәп лагерена 21 көнгә юллама бәясе 769 сумны тәшкил иткән, калган өлеше республика бюджетыннан финанслана. Махсус хәрби операциядә катнашучыларның балалары сменаларга бушлай йөри.

Ата-аналарга уңайлы булсын өчен лагерьларда 8:00 дән 16:00 гә кадәр дежур төркемнәр эшли.

Камилә Вилданова