«Черек күл» паркында сулыкны кышка әзерләү эшләре башланды

«Черек күл» паркында сулыкны кышка әзерләү эшләре башланды

<p> «Черек күл» паркында ясалма сулыкны кышка әзерләү эшләре башланды. Белгечләр күлне киптерү һәм сулык урынын чистарту белән шөгыльләнәләр – кыш көне монда шугалак булачак. </p> <p> Хәзерге вакытта Казанның Парклар һәм скверлар дирекциясе хезмәткәрләре 9 мең куб метр мәйдандагы ясалма сулыкны киптерү һәм аның төбен механик рәвештә чистарту белән шөгыльләнәләр. Эшләр кулдан һәм махсус техника ярдәмендә башкарыла. </p> <p> Сулыкның төбе чистартылганнан соң, белгечләр шугалакны әзерләү эшләренә керешәчәк: боз катыру җайланмаларын һәм су килә торган шлангларны тикшерәчәкләр, баскычларга һәм прокатка биреп тору бинасы белән шугалак арасындагы юлларга резина өслек җәячәкләр. </p> <p> Аннан соң шугалак мәйданчыгының ян-якларына киртәләр куячаклар, тимераякларны вакытлы куллануга биреп тора торган бинаны тәртипкә китерәчәкләр. Шулай ук тематик навигация һәм Яңа ел утлары урнаштырылачак. </p> <p> Парклар һәм скверлар дирекциясендә хәбәр итүләренчә, бәйрәм утларын көйләп куярга кимендә өч атна вакыт кирәк булачак. </p> <p> Әзерлек эшләре тәмамланганнан соң, шугалакта ике этаптан торган боз катыру эшләре башланачак: башта шланглар ярдәмендә касәне су белән тутырачаклар, аннары боз катыру машинасы ярдәмендә каткан боз өслеген тигезләячәкләр. </p> <p> Шәһәр халкы яратып йөри торган шугалак даими салкыннар башлангач эшли башлаячак. </p>

2025-10-28T17:50:33+0300