Яңалыклар

30.04.2022, 15:02

«Черек күл» паркында Кариев театры артистлары «Күпкырлы Тукай» дигән перформанс тәкъдим иттеләр

Чарада татар шагыйренең шигырьләре һәм актерлар үзләре язган әсәрләр яңгырады.

Фото: Денис Гордийко

(Казан шәһәре KZN.RU, 30 нчы апрель). Кичә «Черек күл» паркында Г.Кариев исемендәге театр артистлары «Күпкырлы Тукай» әдәби-хореографик перформансын тәкъдим иттеләр. Чара татар шагыйренең тууына 136 ел тулуга багышланган иде.

Перформанс вакытында Габдулла Тукайның шигырьләре, шулай ук актерларның үзләре язган әсәрләре яңгырады. Алар тамашачыларга шагыйрьнең тормыш юлына һәм иҗатына булган мөнәсәбәтләре турында сөйләделәр һәм Габдулла Тукайга хат яздылар. Декорацияләр итеп татар шагыйренең фотосурәтләре һәм шигырьләре төшерелгән зур кублар кулланылды.

Куелышның режиссеры – Эльдар Гатауллин, хореографы – Елена Музеева. Кариев театры режиссеры сүзләренә караганда, перформанска әзерлек ике атна барган. Беренче тапкыр «Күпкырлы Тукай» тамашасы 24 нче апрельдә Г.Кариев исемендәге театр сәхнәсендә тәкъдим ителде, дип хәбәр итә Казан Башкарма комитетының Тел культурасы өлкәсендә милли сәясәтне гамәлгә ашыру бүлеге.

Фоторепортаж

«Черек күл» паркында «Күпкырлы Тукай» дигән перформанс узды

Шулай ук укыгыз

Барлык яңалыклар