Казан паркларында кошлар өчен азык сату буенча вендинг аппаратлары барлыкка киләчәк

Кышын җәмәгать урыннарында сәүдә нокталары урнаштыру өчен барлыгы 18 аукцион планлаштырылган.

Фото: Денис Гордийко

(Казан шәһәре KZN.RU, 17 нче октябрь, Диана Жиленкова). Казанда ТР башкаласының 11 паркында кышын сәүдә нокталарын урнаштыруга 18 аукцион үткәрү планлаштырылган. Эшмәкәрләр кафе ача, эчемлекләр һәм ризыклар белән фудтрак урнаштыра, аттракционнар һәм вендинглар куя алачак. Сатулар sale.zakazrf.ru операторы мәйданында алып барыла. Бу хакта эшлекле дүшәмбе барышында Казан шәһәре Башкарма комитетында Парклар һәм скверлар дирекциясе башлыгы Айгөл Латыйпова сөйләде.

Хәзерге вакытта паркларда стационар булмаган сәүдә объектларын урнаштыру өчен актив әзерлек бара. А.Латыйпова дирекциянең шәһәрнең актив эшмәкәрлек җәмгыяте белән тыгыз элемтәдә торуын билгеләп үтте. Өстәвенә, һәр сезон белән сәүдә объектларын җәмәгать киңлекләрендә урнаштыруга ихтыяҗ арта бара. Барлык теләүче эшмәкәрләрне дә парклар һәм скверлар физик яктан үзенә сыйдыра алмый.

«Эшмәкәрлек эшчәнлегенә булышлык күрсәтеп, без үзебезгә паркларда мөмкин кадәр күбрәк сәүдә нокталары кую бурычын куймыйбыз, безнең бурыч – паркларда сыйфатлы сервис күрсәтү, – дип аңлатты дирекция башлыгы. - Җәмәгать киңлекләре, шәһәрлеләр өчен генә түгел, бизнес алып бару өчен дә уңайлы урынга әйләнсен өчен, проектлау стадиясендә үк зур эш алып барыла».

Паркларда кош-корт азыгы сату буенча вендинг аппаратлары урнаштыру өчен торглар үткәрү яңалык булачак. Спикер аңлатканча, еш кына килүчеләр азык сыйфатында ипи кулланалар. Ләкин бу кошларның сәламәтлегенә зыян китереп кенә калмый, аларның үлеменә дә китерергә мөмкин. «Үткәрелгән аукцион нәтиҗәләре буенча кышкы сезонда кошлар өчен яраклы азык белән Урицкий исемендәге һәм «Крылья Советов» паркларында җимлекләр барлыкка киләчәк. Алга таба без бу тәҗрибәне ихтыяҗ булган башка җәмәгать киңлекләренә дә таратырга уйлыйбыз», – дип аңлатты А.Латыйпова.

Шулай ук ул паркларда сәүдә сервислары һәм хезмәтләре сыйфатын сакларга, сатуларда актив катнашырга чакырды. Электрон аукционнарда катнашу тәртибе турында тулырак мәгълүмат белән Мэрия сайтының Казанның парклар һәм скверлар дирекциясе бүлегендә һәм учреждениенең социаль челтәрләрендә танышырга мөмкин.

Шәһәрнең җәмәгать киңлекләрендә хәзер сезонлы эшләр бара: су сибү системалары ябыла, күпьеллык чәчәкләр каплана, агачлар киселә һәм үләннәр чабыла.

Паркларда җәмәгать бәдрәфләре кышкы режимга күчкән, алар көнгә 8 сәгатькә кадәр эшлиләр. Озакламый паркларда һәм скверларда фонтаннарны да яба башлаячаклар.