Ноябрьдә Иске Татар бистәсендә бушлай фильмнар күрсәтәчәкләр

Киносеанслар чәршәмбе көннәрендә уза

Иске Татар бистәсендә бушлай кино күрсәтү дәвам итә. Сеанслар чәршәмбе көннәрендә уза.

Бүген тамашачы 2014 елгы «Рудольф Нуриев. Рудик.» кинолентасын күрәчәк. Фильм татар драматургы Рабит Батулланың «Бию җене кагылган егет» романы буенча төшерелгән. Картина малайның, каршылыкларга карамастан, үз хыялына таба баруы, биюченең характеры ничек формалашуы һәм аның гомумдөнья танылуына ничек килүе турында сөйли.

Шулай ук җәдвәлдә – 2023 елгы «Баба Яга спасает мир» комедиясе, анда төп геройларның берсе – мәктәп укучысы Сеня. Аңа һәм башка персонажларга борынгы явызлыкны җиңү өчен көчләрен берләштерергә туры киләчәк. Картинаны 20 ноябрьдә карарга мөмкин.

Соңгы сеанста ноябрьдә 2023 елда төшерелгән «Дух Байкала» лентасын күрсәтәчәкләр. Әтисе, улының игътибарын әнисен югалту кайгысыннан читкә юнәлтү өчен, аны кышын бабасы янына балыкка алып бара. Ләкин юлда алар буранга эләгәләр һәм Байкал бозында югалалар. Авырлыкларны җиңәргә һәм кире кайтырга көч табарга аларга мәхәббәт һәм күлнең серле көче ярдәм итәчәк. Фильмны 27 ноябрьдә күрсәтәчәкләр.

Бүген сеанс 15:00 сәгатьтә узачак, башка күрешүләрнең башлану вакытын телеграм-каналда чыгарачаклар. Картиналарны карау өчен алдан теркәлү кирәк. Барлык теләүчеләрне Каюм Насыйри ур., 38 нче йортта көтәчәкләр, дип хәбәр иттеләр «Иске шәһәр» префектурасы матбугат хезмәтендә.

Шулай ук укыгыз

Барлык яңалыклар