Яңа уку елында Казан укучыларының ата-аналары мәктәпләрдә туклануны электрон форматта бәяләячәк

Мәктәп менюсыннан ризыкларны бәяләү өчен махсус кушымта эшләү турында Казан Мэры август педконференциясендә хәбәр итте.

Фото: Денис Гордийко

(Казан шәһәре KZN.RU, 26-нчы август, Алинә Бережная). Мәктәп туклануы буенча ата-аналар контроле электрон форматка күчәчәк – мәктәп менюсыннан ашамлыкларны бәяләү өчен махсус кушымта эшләнәчәк. Бу хакта бүген мәгариф хезмәткәрләренең традицион август конференциясендә Казан Мэры Илсур Метшин хәбәр итте. Шәһәрнең педагогик составы белән очрашу «Арт Сити» торак комплексында урнашкан яңа «Унбер» мәктәбендә уза.

Шәһәр башлыгы ассызыклаганча, узган ел мәктәпләргә кертелгән ата-аналар контроле үзен яхшы яктан күрсәтте, аны яңа уку елында да дәвам итәргә кирәк. Илсур Метшин контрольнең электрон форматын кулланырга тәкъдим итте.

«Яңа уку елында форматны үзгәртергә, электрон кушымта ясарга мөмкин. Моның ничек эшләячәген карарбыз һәм соңрак барысын да кушымта белән таныштырырбыз», – дип билгеләде шәһәр башлыгы.

Исегезгә төшерәбез, ата-аналар контроле ел башында мәктәп туклануы сыйфатын арттыру максатыннан старт алды. Апрель аенда шәһәр Мэрының «Сәйдәш» мәдәни үзәгендә ата-аналар һәм мәктәп директорлары белән очрашуында проектка йомгак ясалды. Ул чакта Казан ашханәләрендә 8 меңнән артык ата-ана булуы, аларның 98%-ы уңай бәяләмәләр калдыруы, ә ата-аналарның ризыкның тәм сыйфаты, туклану температурасы һәм гомумән туклануны оештыруга карата шикаятьләре кимегән булуы турында әйтелде.