Яңа ел каникулларында ЮХИДИ хезмәткәрләре Казанда «Яшь пассажирларның гомерен саклыйк» дигән рейд үткәрәчәк

Ел башыннан Татарстан башкаласында балалар катнашында 133 авария булган.

Фото: Денис Гордийко

(Казан шәһәре KZN.RU, 28-нче декабрь). Яңа ел каникуллары чорында Казан Дәүләт автоинспекциясе «Яшь пассажирларның гомерен саклыйк» дигән махсус рейд уздырачак. ЮХИДИ инспекторларының игътибары астында автомобиль салонында балаларны йөртү кагыйдәләрен бозучы машина йөртүчеләр булачак.

Шулай ук каникул алдыннан инспекция хезмәткәрләре, гадәттәгечә, мәгариф учреждениеләренә юл хәрәкәте иминлеге буенча лекцияләр һәм әңгәмәләр белән чыга. Алар балаларга кышкы чорда юлларда куркынычсызлыкның төп кагыйдәләре турында искә төшерә.

Ел башыннан Казанда 133 авария булган, нәтиҗәдә өч бала үлгән һәм 138 яшь казанлы төрле дәрәҗәдәге җәрәхәтләр алган. Россия Эчке эшләр министрлыгының Казан буенча ЮХИДИ бүлегенең пропаганда бүлегендә хәбәр итүләренчә, балалар катнашындагы юл-транспорт һәлакәтләренең 20%-ы юл хәрәкәтендә катнашучыларның үзләре саксызлыгы аркасында килеп чыккан. Еш кына мондый хәлләр күрүчәнлекне чикли торган предмет аркасында юл өлешенә чыгу белән озатыла. «Шунысын билгеләп үтәргә кирәк, күз күремен машина юллары буйлап туктап торган машиналар гына түгел, сәүдә нокталары да чикли ала», – дип сөйләделәр Дәүләт автоинспекциясендә. Шуңа бәйле рәвештә, ЮХИДИ барлык җәяүлеләрне, машина йөртүчеләрне һәм бигрәк тә балаларны мондый очракларда өстәмә саклану чаралары күрүләрен сорый.

Дәүләт автоинспекциясе башкала халкына һәм кунакларына яңа ел алды чорында һәм каникуллар көннәрендә халык күңел ачуларын үткәрү урыннарында юл хәрәкәте иминлеген арттыру өчен зур контроль турында искә төшерә.

Билгеләп үтәбез, бәйрәмнәр вакытында ЮХИДИ үзгәртелгән эш графигына күчә. Тулырак мәгълүматны сылтама буенча алырга мөмкин.

Шулай ук укыгыз

Барлык яңалыклар