14 гыйнварга каршы төндә Казан урамнарын кардан чистартырга 290 берәмлектән артык махсус техника чыгачак

Юл хезмәтләре казанлылардан автомобильләрне машиналар йөрү өлеше буенда калдырмауларын сорый.

Фото: Марат Мугинов

(Казан шәһәре KZN.RU, 13-нче гыйнвар). 14-нче гыйнварга каршы төндә Казан урамнарын кардан чистарту өчен 66 юл эшчесе һәм 297 махсус техника, шул исәптән 79 катнаш юл машинасы, 56 трактор щеткасы, 87 самосвал, 42 фронталь төягеч, 9 «Барсик» минитөягече һәм башка техника җәлеп ителәчәк.

Карны Батурин, Бауман, Большая Красная, Гудованцев, Декабристлар, Ильич, Карл Маркс, Каюм Насыйри, Красиков, Сул як Болак, Лена, Мәрҗани, Маяковский, Миславский, Петербург, Уң як Болак, Сафьян, Товарищеская, Тула, Тэцевская, Университет, Сибгат Хәким, Челюскин, Четаев, Чистай, Яруллин, шулай ук Әмирхан, Ямашев проспектларыннан һәм башка участоклардан чыгару планлаштырыла.

Кайбер урамнарда катнаш юл машиналарын һәм трактор щеткаларын кулланып, сибү һәм себерү, шулай ук ротор һәм грейдерлар эше башкарылачак, дип хәбәр иттеләр шәһәрнең Тышкы төзекләндерү комитетында.

Юл хезмәтләре казанлылардан үзләренең автомобильләрен юл читендә калдырмауларын сорый, алар махсус техника эшенә комачауларга мөмкин.

Шулай ук укыгыз

Барлык яңалыклар