Казанның берничә районында бүген чыршы шәһәрчекләре ачылачак

Халык өчен Кыш Бабай катнашында Яңа ел программасы әзерләнде

Татарстан башкаласында бүген, 27 декабрьдә, берьюлы берничә районда чыршы шәһәрчекләре ачылачак. Халык кышкы күңел ачуларга кушыла ала: Кыш бабай белән очраша, Яңа ел җырларына бии яки башкалар белән бергә җырлый ала.

Беренче чыршы Идел буе районында 17:00 сәгатьтә Рихард Зорге урамындагы 47 нче һәм 49 нчы йортлар янында ачыла. Киләсе чыршы бәйрәме —17:30 сәгатьтә Вознесенск бистәсендә (Нардуган ур., 45). «Светлая долина» торак комплексы янындагы паркта шәһәр халкы өчен бәйрәм программасы 19:30 сәгатьтә башлана.

Урам тамашасы 19:00 да Совет мәйданында, ә 20:30 да Дәрвишләр бистәсендә Мир урамындагы скверда узачак. Казан Кремле территориясендә 22:00 сәгатькә кадәр Яңа ел ярминкәләре эшләвен дәвам итә.

Исегезгә төшерәбез, бәйрәм көннәрендә шәһәрнең 28 җәмәгать урынында 106 чара оештырыла. Халык һәм туристлар өчен театральләштерелгән тамашалар, җыр һәм бию кичәләре, орнитологик сәфәрләр, мастер-класслар һәм башкалар әзерләнде. Яңа елны гадәттәгечә халык «Черек күл» паркы шугалагында каршы алырга мөмкин. Барлык теләүчеләрне ил һәм төбәк башлыкларының мөрәҗәгатьләрен трансляцияләгән бәйрәм программасы көтәчәк.

Шулай ук укыгыз

Барлык яңалыклар