«Казан Экспо» халыкара күргәзмәләр үзәгендә киләсе атнада Kazan Digital Week халыкара форумы узачак

Фикер алышу өчен төп темалар интеллектуаль транспорт системалары, киберкуркынычсызлык һәм башкалар булачак

Фото: Марат Мөгыйнов

(Казан шәһәре KZN.RU, 14 нче сентябрь). 20-22 нче сентябрьдә «Казан Экспо» халыкара күргәзмәләр үзәгендә Kazan Digital Week – 2023 халыкара форумы узачак. Бер мәйданчыкта цифрлы технологияләр, программа тәэминаты һәм югары технологияле продукция җитештерүчеләр һәм кулланучылар җыелачак. Дискуссияләр офлайн һәм онлайн форматта узачак.

Катнашучылар интеллектуаль транспорт системалары, яңа заман кибер куркынычсызлыгы, дәүләт идарәсендә цифрлы технологияләр, мәгариф, мәдәният, медицина, авыл хуҗалыгы һәм башка темалар турында фикер алышачаклар.

«Казан Экспо» халыкара күргәзмәләр үзәгендә традицион рәвештә югары технологияле эшләнмәләр, программа тәэминаты, программа-аппарат комплекслары һәм техника һәм җиһазларның гамәлдәге үрнәкләре күргәзмәсе узачак. Ә аерым конкурста ун тематик юнәлештә иң яхшы ИТ-компанияләр сайланачак.

Катнашучыларны теркәү рәсми сайтта башкарыла.

Оештыручылар булып Россиянең Цифрлы үсеш, элемтә һәм массакүләм коммуникацияләр министрлыгы һәм Татарстан Хөкүмәте тора.

Узган ел Kazan Digital Week форумы 65 илдән 18 меңнән артык кешене җыйды. Алар программага онлайн һәм офлайн форматта кушылдылар. Киберкуркынычсызлыктан алып авыл хуҗалыгы һәм мәдәнияткә кадәр тормышның барлык өлкәләрендә цифрлаштыруга багышланган барлыгы 120 чара оештырылган.

Шулай ук укыгыз

Барлык яңалыклар