Казан епархиясе музеенда кулъязма һәм иске китаплар тәкъдим ителәчәк

Кунаклар Елизавета Библиясенең беренче басмасын, Острожская Библиясен һәм башка экспонатларны күрәчәкләр

Фото: Казан епархиясе матбугат хезмәте

(Казан шәһәре KZN.RU, 23 нче май). Бүген Казан епархиясе музеенда «Казанда Библиянең биш гасыры» кулъязма һәм иске китаплар күргәзмәсе ачыла. Татарстан башкаласында яшәүчеләр һәм кунаклар анда 15 нче августка кадәр була алачак.

Күргәзмәдә Россиядәге беренче тулы басма Библияләр тәкъдим ителә: Острожская Библия (1581 ел), патша Алексей Михайлович Библиясе (1663 ел), Елизавета Библиясенең беренче басмасы (1751 ел). Экспозиция шулай ук Псалтирьләрнең кулъязма һәм иске басма китапларын, тәхет алды Инҗилләрен, XVI-XVIII гасырларның Изге Язма текстлары тәфсирләрен үз эченә ала.

Бер бүлек Изге Язмаларның гарәп, яһүд, кыргыз, татар, чуаш, черемис (мари), вотяк (удмурт), мордва телләрендәге басмаларына багышланачак.

Кунаклар Казанда китап басу тарихы, Изге Язмалар топонимикасы, Изге Язма текстларын тәрҗемә итү тарихы, Казан дини академиясе профессорлары һәм изге Гурий кардәшлеге әгъзалары хезмәтләре белән таныша алачак. Музей шулай ук истәлекле бүләкләр белән викторина оештыра. Күргәзмәне көн саен 10:00 сәгатьтән 16:00 сәгатькә кадәр Большая Красная урамы, 5 адресы буенча карарга мөмкин. Ачылу 23 нче майда 15:30 сәгатьтә узачак. Чарада Казан һәм Татарстан митрополиты Кирилл катнашачак, дип хәбәр итә епархиянең матбугат хезмәте.

Күргәзмәне епархия музее ТР Милли музее, Н.И.Лобачевский исемендәге КФУ фәнни китапханәсе, республика Милли китапханәсе, Казан дини семинариясе китапханәсе, император православие Палестина җәмгыятенең Татарстан төбәк бүлеге әзерләгән. Экспозицияне бизәүдә КФУның ботаника уку бакчасы ярдәм иткән, ул Библияләрдә искә алынган үсемлекләрнең үрнәкләрен биргән.

Шулай ук укыгыз

Барлык яңалыклар