Казанның муниципаль архивында XIX гасыр документлары табылган

Шәһәрнең гомуми һөнәрчелек идарәсе аттестатын 1896 елда балта остасына кызыл агачтан җиһазлар ясау өчен биргәннәр

Фото: Денис Гордийко

(Казан шәһәре KZN.RU, 24 нче август, Камилә Вильданова). Муниципаль архив хезмәткәрләре XIX гасыр документларын тапкан. Казан гомуми һөнәрчелек идарәсе аттестаты 1896 елда кызыл агачтан җиһазлар ясау өчен балта остасы Иван Александрович Афанасьевка бер елга бирелә. Табылган документ буенча Казанда ул елларда җиде төрле цех булганлыгы ачыкланган. Безнең көннәрдә бу аттестат хезмәт эшчәнлеген гамәлгә ашыруга лицензия аналогы булып тора. Казан шәһәр Думасы сессиясендә кызыклы табыш турында Муниципаль архив идарәсе башлыгы Гөлнара Мусина хәбәр итте.

Табылган материаллар арасында шулай ук шәһәр Думасы документы – Казан планыннан Александр II һәйкәлен кую өчен урынны күрсәтеп, 1890 ел белән даталанган күчермә кызыксыну уята. Монумент 1895 елның 30 нчы августында Ивановск мәйданында, хәзерге 1 нче Май мәйданында ачылган, хәзер анда Муса Җәлил һәйкәле урнашкан.

«Архивта сакланган барлык документлар да кыйммәт экспертизасын уза. Аларның аерым тарихи әһәмияткә ия булганнары аеруча кыйммәтле статуска ия була ала. Быел архивның 10 документы аеруча кыйммәтле дип танылды, алар Бөек Ватан сугышы чоры белән бәйле», – дип өстәде Гөлнара Мусина.

Искәртеп узабыз, Татарстан Республикасында дәүләт хезмәте – Россиядә иң борынгыларның берсе, ул быел 105 елны билгеләп үтә. Архив фонды илдә иң эреләр рәтенә керә, Мәскәү, Ленинград һәм Түбән Новгород фондларыннан калыша. Сакланган документлар 1709 ел белән даталана, ә аерым материаллар XI һәм XVII гасырларга карый.