Халыкара туган тел көнендә «Апуш» студиясе «Кечтүк» спектаклен күрсәтәчәк

Хәзер студиядә өч мәдәният учреждениесе базасында 9-15 яшьлек 90 укучы шөгыльләнә.

Фото: Денис Гордийко

(Казан шәһәре KZN.RU, 20 нче февраль, Татьяна Марюхова). 21 нче февральдә билгеләп үтелә торган Халыкара туган тел көнендә Ленин исемендәге мәдәни-күңел ачу комплексы сәхнәсендә «Апуш» балалар студиясенең «Кечтүк» спектакле премьерасы булачак. Шул ук көнне Н.Җиһанов исемендәге Казан консерваториясе студентлары һәм укытучылары катнашында Василий Аксенов музей-йортында Федор Шаляпинга багышлау-концерт планлаштырыла. Бу хакта эшлекле дүшәмбе киңәшмәсендә шәһәр Башкарма комитеты җитәкчесе урынбасары Гүзәл Сәгыйтова сөйләде.

«Төрле культураларның бергә үрелеп яшәве ягыннан Казан чыннан да үзенчәлекле урын. Безнең шәһәргә беренче тапкыр килүчеләр моңа гаҗәпләнә, ә безнең өчен бу гадәти атмосфера. Һәм безнең бурыч – әлеге уникальлекне саклап калу, шулай ук балаларыбызга һәм оныкларыбызга тапшыру», – дип билгеләде Казан Башкарма комитеты җитәкчесе Рөстәм Гафаров.

Драматург, ТРның атказанган сәнгать эшлеклесе Илгиз Зәйниев пьесасы буенча куелыш «Апуш» балалар татар театр студиясендә тәрбияләнүчеләр күрсәтәчәк дүртенче спектакль булачак. Спектакль 18:00 сәгатьтә башлана.

Студия үз эшен бер ел элек «Сәйдәш» мәдәни үзәгендә Казан Мэры Илсур Метшин химаясендә башлады. Ә көздән студияләр өч үзәктә – «Сәйдәш», «Чулпан» һәм Ленин исемендәге мәдәни-күңел ачу комплексында эшлиләр. 2022 елда «Апуш» студиясе 2 спектакль – «Апушның тылсымлы төшләре» һәм «Зоопарк-Әлифба» чыгарды һәм «Театраль Идел буе» фестиваленең республика этабында җиңүче булды. Быел үзенең беренче спектаклен «Чулпан» мәдәни үзәгендә урнашкан студия тәкъдим итте. Танылган мәгърифәтче, галим, педагог, язучы, этнограф Каюм Насыйриның «Әбүгалисина» әсәрен беренче тапкыр мюзикл жанрында тәкъдим иттеләр.

Г.Сәгыйтова сөйләвенчә, хәзер студияләргә 9-15 яшьлек 90 укучы йөри. Балаларны профессиональ педагоглар, Татарстанның халык артистлары өйрәтә. Атнага өч тапкыр актерлык осталыгы, хореография, сәхнә чыгышы, татар телендә вокал буенча дәресләр уза, яңа спектакльләр репетицияләре бара.

Шәһәр Башкарма комитеты җитәкчесе урынбасары быел Казанда беренче тапкыр «Гәүһәр» балалар фестивале узуын искәртте. 7 нче февральдә «Чулпан» мәдәни үзәгендә «Хәрәкәттә – бәрәкәт» һәм «Сөйлә» проектларында катнашкан 1000 баланың 150 се зур сәхнәдә чыгыш ясады. Алар 40 мәктәптә һәм 20 балалар бакчасында тәрбияләнәләр. Гүзәл Сәгыйтова хәбәр иткәнчә, быел гомуми белем бирү учреждениеләре санын, димәк, педагоглар санын да арттыру планлаштырыла. Мастер-классларның юнәлешләре һәм жанрлары да күбрәк булачак.

Фото: Марат Мөгыйнов