Чумылдыру көннәрендә Казанда гыйбадәтләр һәм бәйрәм чаралары узачак

Төнге гыйбадәтне укыганнан соң барлык гыйбадәтханәләрдә һәм кайбер сулыкларда су изгеләндереләчәк

Фото: Денис Гордийко

(Казан шәһәре KZN.RU, 17 нче гыйнвар). Татарстан башкаласында чумылдыру көннәрендә бәйрәм чаралары һәм төнге гыйбадәтләр планлаштырылган. Гыйбадәт укыганнан соң барлык гыйбадәтханәләрдә һәм кайбер сулыкларда суны изгеләндерү йоласы башкарылачак.

Бәйрәм гыйбадәтләре 18 нче гыйнвардан 19 нчы гыйнварга каршы төндә планлаштырылган. Мәсәлән, 0:00 сәгатьтә Декабристлар урамы, 98 адресы буенча Введенский Кизический монастыренда гыйбадәт башлана. Изге газап чигүче Кирилл Казанскийның Архиерей ишегалдына шәһәр халкын 23:45 сәгатькә чакыралар. Чиркәү Чистай урамы, 30 адресы буенча урнашкан. Изге Сергий Радонежский гыйбадәтханәсендә гыйбадәт кылу Япеев урамы, 2 адресы буенча 23:30 сәгатьтә башланачак. 23:40 сәгатьтә дин тотучыларны Сафиуллин урамы, 7 адресы буенча урнашкан преподобный Серафим Саровский гыйбадәтханәсендә көтәчәкләр.

19 нчы гыйнварда барлык гыйбадәтханәләрдә һәм кайбер ачык сулыкларда бәйрәм гыйбадәтләреннән соң су изгеләндереләчәк, шуннан соң купельләрдә традицион массакүләм су коену башланачак.

Быел Идел буенда Красная Горка поселогындагы Никольский гыйбадәтханәсе янында, Югары Кабан күлендә (Сокол кафесы янында һәм Борисково урамы янында) чумарга мөмкин булачак. Моннан тыш, су коену Спас-Евдокиевский гыйбадәтханәсе янындагы ябык купельләрдә һәм Савиново поселогындагы «Живоносный Источник» Мәрьям Ана иконасы гыйбадәтханәсе янында оештырылачак.

Барлык купельләр вакытлыча урам утлары белән тәэмин ителәчәк. Су коену урыннарына керү юлларын чистартачаклар, ә иорданнарны коймалар, агач түшәмнәр һәм чыршы ботаклары белән җиһазландырачаклар. Дин тотучыларга уңайлы булсын өчен, купельләр янында киенү өчен палаткалар урнаштырылачак, кайнар чәй һәм ризык белән сәүдә нокталары эшләячәк.

Һәр купель янында полиция һәм ашыгыч ярдәм бригадасы хезмәткәрләре, шулай ук ашыгыч ярдәм күрсәтү өчен кирәкле җиһазлар белән тәэмин ителгән коткаручылар кизү торачак.

Суны Идел буенда, Югары Кабан күлендә, шулай ук Савиново поселогының чиркәү купелендә 10:30 сәгатьтә изгеләндерәчәкләр. Спас-Евдокиевский гыйбадәтханәсендә купельдәге суны изгеләндерү 10:15 сәгатькә планлаштырылган, дип хәбәр иттеләр Казан епархиясенең матбугат хезмәтендә.

Шулай ук укыгыз

Барлык яңалыклар