Халык санын алу барышында казанлыларга өйләнгәнме-юкмы икәнлекләре турында сорау бирәчәкләр

Әлеге сорау ил халкына биреләчәк 30 сорауның берсе булып тора.

(Казан шәһәре KZN.RU, 10-нчы июнь). Казанлыларга алдагы Бөтенроссия халык санын алу барышында гаилә хәле турындагы (рәсми яки теркәлмәгән никах) сорау бирәчәкләр. Әлеге сорау ил халкына биреләчәк 30 сорауның берсе булып тора.

«Л» формасының бланкында урнашкан сорау болай яңгыраячак: «Сезнең гаилә хәлегез нинди?». Респондентларга түбәндәге берничә вариант җавап тәкъдим ителәчәк: «теркәлгән никахта торам», «теркәлмәгән никахта торам», «рәсми рәвештә аерылдым (аерылышу теркәлгән) «бергә тормыйбыз», «тол», «беркайчан да никахта булмадым».

Дәүләт статистикасы бүлегендә билгеләп үтүләренчә, барлык җавапларны исәпкә алу кәгазьләренә респондентлар сүзләре белән кертәләр. Бернинди раслаучы документлар да кирәк булмаячак.

2010 елгы халык санын алу мәгълүматлары буенча, Казанның 60% ир-аты һәм 47% хатын-кызы үзен никахта торучы дип атаган. Шулай итеп, сораштырылган һәр бер мең ир-атка өйләнешүчеләрнең 609-ы туры килгән, 539 - теркәлгән никахта, 70 - теркәлмәгән килеш. Беркайчан да никахта тормаулары турында 288 респондент хәбәр иткән (һәр бер меңгә), рәсми аерылышучылар (яки бергә тормаучылар) - 69, тол калулар - 34.

Әлеге сорауга Казанда яшәүче хатын-кызлар башкачарак җавап биргән. Сораштыруда катнашкан һәр бер мең хатын-кызның 469-ы никахта торуын җиткергән (теркәлгән никахта - 416, теркәлмәгән никахта - 53). 236 хатын-кыз беркайчан да никахта тормаганлыгын хәбәр иткән, рәсми рәвештә аерылышучылар саны (яки аерым торучылар) - 120. Сораштырылган һәр мең хатын-кызның 175-е үзен толлар рәтенә керткән.

2010 елгы халык санын алу мәгълүматлары буенча, Казанда 1143,5 мең кеше яшәгән, шуларның 635,1 меңе - хатын-кыз һәм 508,4 меңе - ир-ат. 2020 елның 1-нче гыйнвары мәгълүматлары буенча, халык саны 1257,4 мең кеше тәшкил иткән.

Россия халкының саны һәм структурасы турында актуаль мәгълүматлар Бөтенроссия халык санын алуны уздырганнан соң алыначак. Моңа кадәр Бөтенроссия халык санын алуның төп этабы 2020 елның 1-нче октябреннән 31-нче октябренә кадәр узар, дип планлаштырылган иде. Илдә катлаулы эпидемиологик вәзгыять белән бәйле рәвештә Росстат аны 2021 елга күчерү тәкъдиме белән чыкты. Бөтенроссия халык санын алуны уздыру сроклары Россия Федерациясе Хөкүмәте тарафыннан билгеләнәчәк. Алдагы халык санын алу ил тарихында уникенче булачак һәм яңа - цифрлы форматта узачак.

Шулай ук укыгыз

Барлык яңалыклар